15 августа 2014 г.
Сире Хула кунĕ ячĕпе чун-чĕререн саламлатăп!
Чăваш Енĕн тĕп хули çулран çул ỹсет, аталанать, çав вăхăтрах хăйне евĕрлĕхне упраса хăварма мехел çитерет. Паянхи Шупашкар - республика мухтавĕ, хăватлă индустри центрĕ, Раççейри чи хăтлă хуласенчен пĕри, пуян культурăллă, çирĕп йăла-йĕркеллĕ.
Хула çыннисен пурнăç шайне ỹстерме пулăшакан программăсем ăнăçлă пурнăçланаççĕ. Юлашки виçĕ çулта нумай хваттерлĕ çуртсен картишĕсенчен çурри ытла пайне, вĕсен таврашĕнчи çул-йĕре тĕпрен юсанă, виçĕ çултан аслăрах ачасем садике вырнаçма черет кĕтмеççĕ, транспорт инфратытăмĕ улшăнса лайăхланчĕ, çурт-йĕр строительстви хăвăртланчĕ. Социаллă пĕлтерĕшлĕ объектсем хута каяççĕ, çак шутра нумай функциллĕ, çичĕ пин вырăнлă Пăр керменĕ. Кунта çавăн пекех спорт тата культура мероприятийĕсене ирттерме, маунтинбайк, биатлон тата ухăран перес енĕпе олимп чемпионĕсене хатĕрлекен центр йĕркелеме палăртнă.
Шупашкар çыннисем пĕтĕм çĕр-шыва тĕслĕх кăтартаççĕ: сывă пурнăç йĕркине тытса пыраççĕ, спортпа туслашаççĕ, пĕр-пĕрне сывлăха çирĕплетме хавхалантараççĕ. Ахальтен мар ĕнтĕ республикăн тĕп хулинче 2014 çулхи юпа уйăхĕн 9-11-мĕшĕсенче Пĕтĕм Тĕнчери "Раççей - спорт çĕр-шывĕ" форум ирттерме палăртнă. Шупашкар çавăн пекех пĕтĕм тĕнчери ăмăртусене - çăмăл атлетика енĕпе Европăн команда чемпионатне тата хăвăрт утас енĕпе Тĕнче кубокне - ирттерме ирĕк çĕнсе илчĕ.
Тăван Шупашкара чунтан юратакансене тата унăн аталанăвне тỹпе хывакансене чĕререн тав тăватăп, çирĕп сывлăх, телей, ăнăçу, юрату сунатăп!
Чăваш Республикин Пуçлăхĕ Михаил ИГНАТЬЕВ.