12 августа 2014 г.
Иртнĕ эрне вĕçĕнче Чăваш АССР халăх, РСФСР тава тивĕçлĕ артисчĕ Николай Степанович Степанов çуралнăранпа 90 çул çитрĕ. Вăл Чăваш патшалăх академи драма театрĕн мухтавлă артисчĕсен ушкăнĕнче хăйĕн таланчĕпе уйрăм вырăнта тăрать.
Николай Степанович Тăвай ялĕнче хресчен çемйинче çуралнă. Ялта вăтам шкулта вĕреннĕ чухне Тăван çĕр-шывăн аслă вăрçи пуçланнă. Яш район территорийĕнче çар укрепленийĕсем тума хутшăнать, чертежникре тăрăшнă. Пултаруллă чертежника тепĕр çулхи мартра тин 10-мĕш класа çỹреме ирĕк панă. Вăтам шкул хыçççăн Мускаври патшалăх театр искусствин институтне (ГИТИС) чăваш студине вĕренме кĕнĕ. Ялти шкултах драма кружокĕнче выляканшăн ку ĕмĕт йыхравĕ пулнă. Вера Кузьмина, Иван Алексеев тата Николай Степанов ГИТИСра аслă пĕлỹ илсе тухнă пирвайхи профессиллĕ чăваш артисчĕсем пулса тăнă. Вĕсем хăйсен пурнăçне чăваш театрĕпе ĕмĕрлĕхе çыхăнтарнă.
"Тулашĕнчен пăхма сăпай, пит палăрмаллах мар рольре те актер таланчĕпе ăсталăхне пула Николай Степанов хăй тăвакан сăнарăн нумай енлĕ шалти тĕнчине психологи тĕлĕшĕнчен хавхаланмалла уçса пама, ăна чун кĕртме, асра юлмалла тума пултарать," -тесе çырнă ун пирки П.Романов писатель, критик-театровед.
Çур ĕмĕре яхăн (1947-1994) Чăваш патшалăх академи драма театрĕнче вăй хунă Николай Степанович, çав хушăра вуншар асра юлмалла сăнар калăпланă. Ку вăл Н.Терентьевăн "Пушар лашинчи" Якку та, А.Эсхелĕн "Виçĕ туйри" Журавлев та, Н.Айзманăн "Çĕмĕрт çеçки çурăлсан" пьесинчи Петя та, Н.Анкиловăн "Салтак арăмĕнчи" Григорий Плетнев та, В.Романовăн "Никита Бичуринĕнчи" Пушкин та, Илпек Микулайĕн "Хура çăкăрĕнчи" Шерккей тата ытти те.
В.РОДИНА, библиотекарь.