08 августа 2014 г.
Чăваш Енĕн строительство отраслĕн хисеплĕ ĕçченĕсемпе ветеранĕсем!
Сире професси уявĕ ячĕпе чĕререн саламлатăп!
Строительство индустрийĕн аталанăвĕ республика экономикишĕн пысăк пĕлтерĕшлĕ. Строительство калăпăшĕ ỹссе пыни ăна çывăх производствăсене хăват парать, социаллă ыйтусене тухăçлă татса пама пулăшать.
Республикăн строительство отраслĕнче ỹсĕм палăрать. "Строительство" ĕç-хĕл енĕпе пурнăçланă ĕçсен калăпăшĕ 2012 çулта 28400,1 млн. тенкĕпе танлашнă, 2013 çулта 32033,5 млн. тенке çитнĕ. 2014 çулăн пĕрремĕш çурринче "Строительство" ĕç-хĕл енĕпе 16299,5 млн. тенкĕлĕх ĕç пурнăçланă, иртнĕ çулхи çак тахăрти шайлашуллă хаксемпе ку 111,8 процентпа танлашать.
Чăваш Енре федерацин тата республикăн граждансен пурăнмалли çурт-йĕр условийĕсене лайăхлатмалли программисем ăнăçлă пурнăçланаççĕ. Республикăра 2011 çулта тивĕçлĕ йышăнусем тунă май çамрăк 6 пин çемьешĕн ипотека кредичĕсен процент виçине 4 процент пĕчĕклетнĕ. Ялсенче патшалăх çамрăк çемьесене, агропромышленноç комплексĕн тата социаллă сфера ĕçченĕсене паракан субсидисен виçи туяннă е тунă çурт-йĕрĕн 70 процентне çитет. Тăлăх ачасене çурт-йĕрпе тивĕçтермелли программа ăнăçлă ĕçлет. Республикăра пурăнакансем валли экономкласс йышши çурт-йĕр тăвассине вăй памалли мерăсен витĕмĕ курăмлă.
2011-2013 çулсенче пĕтĕмпе Чăваш Енри 15 пин ытла çемье патшалăх пулăшнипе хăйсен çурт-йĕр условийĕсене лайăхлатнă.
Республикăра пурăнмалли çурт-йĕр строительствин хăвăртлăхĕ ỹссе пырать, çĕнĕ территорисенче комплекслă майпа çурт-йĕр çĕклесси малалла пулса пырать, ял-хула хăтлăланать, илемленет. 2013 çулта пурăнмалли 837 пин тăваткал метр çурт-йĕр тунă. Çав шутра 367 пин тăваткал метрне застройщик шутланакан организацисем хута янă, ку 2010 çулхи шайăн 121,9 проценчĕпе танлашать. Кăçал çулталăкăн пĕрремĕш çурринче застройщик-организацисем хута янă пурăнмалли çурт-йĕр лаптăкĕ иртнĕ çулхи çак тапхăртинчен 48,2 процент пысăкланнă.
Строительство отраслĕн ĕçченĕсене тата ветеранĕсене, объектсен строительствине тата территорисене тирпейлессине хутшăнакан, илем тата хăтлăх кỹрекен мĕн пур çынна тухăçлă ĕçшĕн чунтан тав тăватăп. Сире сывлăх, ĕçре çитĕнỹсем, телей тата ырлăх сунатăп!
Чăваш Республикин Пуçлăхĕ М.ИГНАТЬЕВ.
Хаклă ентешĕмсем, хисеплĕ спортсменсем, тренерсем, спорт юхăмĕн ветеранĕсем, физкультурăпа спорта юратакансем, сывă пурнăç йĕркине тытса пыма ăнтăлакансем!
Сире Физкультурник кунĕ ячĕпе чун-чĕререн саламлатăп!
Физкультурăпа спорт кашни çын пурнăçĕнче пысăк пĕлтерешлĕ, вĕрентỹпе воспитани тытăмĕн пĕр пайĕ пулса тăраççĕ. Физкультурăпа туслашнă май сывлăх, кăмăл, тỹсĕмлĕх, хамăр вăя шанасси çирĕпленеççĕ.
Пирĕн республикăра массăллă физкультурăпа спорт занятийĕсем валли пĕтĕм услови пур. Юлашки 5 çулта халăха спорт сооруженийĕсемпе тивĕçтересси 36-ран 46 процент таран пысăкланнă. Чăваш Енĕн кашни районĕпе хулинче çĕнĕ йышши физкультурăпа сывлăх комплексĕсем, стадионсем, спорт площадкисем тунă. Пысăк çĕнĕ спорт объекчĕсем çĕкленеççĕ. Çав шутра - Шупашкарти 7 пин çынна йышăнмалли Пăр кермен (нумай функциллĕ универсаллă центр) регионти Олимп хатĕрленĕвĕн велоспорт-маунтинбайк тата биатлон центрĕсем, лаша спорчĕн комплексĕн тăрă айĕнчи манежĕ.
Кăçалтан республикăра уйăхсерен Сывлăхпа спорт кунне ирттеретпĕр - кăмăл пуррисем республикăри спорт сооруженийĕсене тỹлевсĕрех килме пултараççĕ. Патшалăхăн тĕллевлĕ политики лайăх кăтартусем тума май пачĕ. Паянхи кун тĕлне Чăваш Енре пурăнакансен 36 процентне яхăн йышĕ физкультурăпа тата спортпа туслă, 2013 çул кăтартăвĕсем тăрăх пирĕн республикăна пуçласа Раççейĕн чи лайăх спорт регионĕ тесе Раççей федерацийĕн Правительстви наци премине пачĕç.
Республикăра пĕтĕм Раççейри тата пĕтĕм тĕнчери пысăк ăмăртусем ытларах та ытларах иртеççĕ. Кăçалхи çĕртме уйăхĕнче Шупашкар Пенсионерсен I спартакиадине йышăнчĕ, унта Раççейĕн 56 регионĕнчен тата 4 ют çĕр-шывран аслă ăрăвăн спортпа туслă представителĕсем килчĕç. Çитес çул республикăн тĕп хулинче çăмăл атлетсен командисен Европа чемпионатне ирттермелле, 2016 тата 2018 çулсенче вара - хăвăрт утакансен Тĕнче кубокне.
Спорт юхăмĕн ветеранĕсене, хăйсен çĕкленỹлĕхĕпе, малашлăха шаннипе, кăмăл хăвачĕпе çамрăксене спортпа туслă пулма, сывă пурнăç йĕркине тытса пыма хавхалантараканскерсене уйрăмах тав тăватăп.
Чăваш Енре пурăнакансене пурне те çирĕп сывлăх, телей, хăйсен вăйне шанма, çĕнтерỹ патне ăнтăлма тата спортра çĕнĕ çитĕнỹсем сунатăп.
Чăваш Республикин Пуçлăхĕ М.ИГНАТЬЕВ.
Хисеплĕ строительсемпе ĕç ветеранĕсем!
Сире професиллĕ уявпа чĕререн саламлатпăр.
Строительство ĕçĕсем пирĕн районта та сарăлсах пыраççĕ. Алексей Мухановпа Михаил Николаев ертсе пыракан организацисем пурăнмалли çурт-йĕр хăпартаççĕ. Шупашкарсем ача сачĕ, фельдшерпа акушер пункчĕ тунă çĕрте хастарлăх кăтартаççĕ. Коллективлă тата хресчен фермер хуçалăхĕсенче çĕнĕ объектсем хута каяççĕ.
Ялсенче уйрăм кил çемьесем капмар çуртсем çĕклеççĕ, ял сăн-сăпатне илем кỹреççĕ. Пурне те çирĕп сывлăх, ăнăçу, телей сунатпăр.
Тăвай район администрацийĕн пуçлăхĕн тивĕçĕсене вăхăтлăха пурнăçласа пыракан В.ЧАЙКИН.