08 августа 2014 г.
Федерацин 136-ФЗ саккунĕпе килĕшỹллĕн вырăнти хăй тытăмлăх органĕсене йĕркелемелли майсене регионсене хăйсене суйласа илмешкĕн ирĕк пани, вĕсене халăхпа сỹтсе явни ырă пулăм тесе хаклатăп. Ял тăрăхĕсем татса памалли вырăнти пĕлтерĕшлĕ ыйтусен хисепне вун виççĕне çити чакарнă, ыттисене район шайне е çỹлерехе параççĕ. Ку тĕрĕс те пулĕ, мĕншĕн тесен укçа-тенкĕпе тивĕçтермен пĕлтерĕшлĕ ĕçсемех пурнăçланмасăр юлма пултараççĕ. Ун пекки ан пултăр тесен çакна шута илме тивет.
Тĕрлĕ шайри пуçлăхсене мĕнле лартас пирки калас пулсан, манăн шухăшăм çапла: район ертỹçине те, ял тăрăхĕсен пуçлăхĕсене те халăхпа тỹррĕн суйласа лартни вырăнлăрах. Мана хама ял çыннисем иккĕмĕш созывра та хăйсен пуçлăхĕ пулма шанчĕç. Районта вара хальхи пек иккĕ мар, пĕр пуçлăх пултăр, тилхепене пĕр ертỹçĕ тытса пытăр. Çакă яваплăха та чылай ỹстерĕ.
В.РАЗИН, Тăрмăш ял тăрăхĕн пуçлăхĕ.