08 августа 2014 г.
Улянкă ялĕнче пурăнакан ĕçпе вăрçă ветеранĕ Илья Иванович Иванов нумаях пулмасть 95 çулхи юбилейне паллă турĕ. Хисеплĕ ватăна Йăнтăрчă ял тăрăхĕн пуçлăхĕн çумĕ А.Уськина саламларĕ. Раççей Президенчĕн Владимир Владимирович Путинăн çырăвне пачĕ, асăнмалăх парнепе чысларĕ, 100 çула çитме çирĕп сывлăх сунчĕ.
Илья Иванович - Тăван çĕр-шывăн Аслă вăрçин вут-çулăмĕ витĕр тухнă паттăр салтак. Вун тăватă çул каялла Аслă çĕнтерĕве халалланă Мускаври парада хутшăнма тивĕçлĕ пулнă пирĕн маттур ентешĕмĕр. Çапăçусенчи паттăрлăхшăн орденсемпе медальсем парса наградăланă ăна. Вăрçă хыççăнхи пурнăçра Илья Иванович хăйĕн шăпине çамрăк ăрăва вĕрентсе воспитани парассипе çыхăнтарнă. Элпуç шкулĕнчи ачасене çар ĕçне хăнăхтарнă. Йăнтăрчăра историпе физкультура вĕрентнĕ, чылай çул кунта шкул директорĕнче тăрăшнă. Хастар ĕçпе вăрçă ветеранне, çамрăксен наставникне районăн, ял тăрăхĕн Хисеп кĕнекине кĕртнĕ.
Чаплă юбилейпе И.Иванова район администрацийĕн пуçлăхĕн пĕрремĕш çумĕ В.Чайкин, районти тата Улянкăри ветерансен совечĕсен председателĕсем Р.Гуринапа Л.Михайлова та саламланă, парнесемпе савăнтарнă.
Н.НИКОЛАЕВ.