08 августа 2014 г.
Ытлари кун район администрацийĕн пуçлăхĕ Владимир Ванерке ертсе пыракан ушкăн Кемĕр облаçĕнчи Прокопьевск районĕнчи Михайловкăна тухса кайнă.
Асăннă ялта Тăвай енре çуралса ỹснисем тĕпленнĕ. Кузбассри чăваш культурин V фестивале хутшăнаççĕ тăвайсем. Туслăх кĕперне хываканĕ - Кузбассри чăваш диаспорин ертỹçи В.Ф.Антонов. Асăннă кĕпер çулсерен çирĕпленсех пырать. Иртнĕ çул кемĕрсем хăйсем Тăвай енре хăнара пулнă. Аякри тăвансене çăкăр-тăварпа, юрă-кĕвĕпе кĕтсе илнĕ районта, тăвайсем мĕн ĕçлесе пурăннипе паллаштарнă. Хаклă хăнасем валли районта пурăнакансем пурте пĕрле чăвашла кĕнекесем, сувенирсем, парнесем хатĕрленĕ.
Кемĕр облаçĕнче 15480 (2012 çулхи кăтарту) чăваш пурăнать. Унта - 19 хула, 50 поселок, яллă 17 район. 2001 çулта Кузбассра чăваш диаспорин культура центрне уçнă. Прокопьевск районĕнче вырнаçнă вăл.
А.АЛЕКСАНДРОВА.