08 августа 2014 г.
Ăçта кăна ĕçлеме тỹр килмен-тĕр Вăтаялĕнчи Герман Иванович Чернова.
Вăтам шкул пĕтернĕ хыççăн - клуб заведующийĕнче, унтан - "Слава" хуçалăхра счетовода пулăшаканра. Çар служби хыççăн тăван яла таврăнса колхозра кассир ĕçне пуçăннă.
1963-1968 çулсенче маттур каччă Чăваш ял хуçалăх институтĕнче агроном дипломне илнĕ. Куславкка районĕнче пĕр çул çак специальноçпа тăрăшнă хыççăн районти "Победа" совхозра уйрăм управляющийĕнче, агрономра, директорта вăй хунă. Совхоз пайлансан "Родина", "Кубнинский" хуçалăхсенче тĕп агроном тивĕçĕсене тỹрĕ кăмăлпа пурнăçласа пынă. Хăй суйласа илнĕ ĕçĕпе "Сельхозхими" пĕрлешỹре те 7 çул тăрăшнă. "Ута" колхоз председателĕнче ĕçлесе пенсие тухнă. Çапла вара Герман Иванович ĕçлĕ çулĕсене ял хуçалăхне аталантарассипе çыхăнтарнă. Çав вăхăтра общество ĕçĕнче яланах активлă пулнă. Ял çыннисем ăна темиçе хутчен Тăвай район, Тĕмер ял Совечĕсен депутачĕ пулма шаннă.
Ĕçри çитĕнỹсемшĕн чылай сумлă наградăна тивĕçлĕ пулнă вăл.
Çак кунсенче ĕç ветеранне 75 çул тултарнă ятпа райадминистраци пуçлăхĕн çумĕ В.В.Чайкин, АПК ветеранĕсен районти канашĕн председателĕ М.Я.Яковлев саламларĕç, вăрăм ĕмĕр, çирĕп сывлăх сунчĕç, асăнмалăх парнепе район администрацийĕн Тав çырăвне пачĕç.
Р.ШУМОВА.