08 августа 2014 г.
Çак кунсенче Тăрмăшра пурăнакан Владислав Денисович Чкалов çуралнăранпа 65 çул тултарчĕ.
Вăл вăтам шкул пĕтерсен Канашри вакунсем юсакан заводра ĕçленĕ. Çав вăхăтрах Ижевскри ял хуçалăх институтĕнчен агронома вĕренсе тухнă. Совет Çарĕнче службăра тăнă хыççăн Шупашкарти машинăсем тăвакан заводра вăй хунă. Малаллахи ĕçсем вара ял хуçалăхĕпе çыхăннă: Тăрмăшри сортсем сăнакан участокра, Ленин ячĕллĕ хуçалăхра агрономра тăрăшнă. 1995 çулта Владислав Денисович Чкалова хуçалăх ертỹçине суйлаççĕ. Вăл общество ĕçĕнче те хастарлăх кăтартать - район тата ял Канашĕсен депутатне суйланать.
Çуралнă кунпа Владислав Денисовича АПК ветеранĕсен районти канашĕн председателĕ Михаил Яковлев, райадминистраци пуçлăхĕн çумĕ Валерий Чайкин ăшшăн саламларĕç, асăнмалăх парне, Тав çырăвĕ пачĕç.
Михаил Яковлевич ял хуçалăхĕнче пĕрле ĕçленĕ вăхăтсене аса илчĕ. Çавра сĕтел хушшинчи ăшă калаçу чылая тăсăлчĕ. Тăвайĕнчен килнисем Владислав Денисовича çирĕп сывлăх, вăрăм кун-çул сунчĕç.
В.ВАСИЛЬЕВ.