08 августа 2014 г.
"Ырă çынна мухтани те ырăлăх кỹрет",-тенĕ халăхра. Çавăнпах алла тытрăм ручкăна.
Хамăр ялти Г.Иванова çинчен хаçатра вуланăччĕ-ха. Ялти пĕве çумĕнче йывăç-тĕм нумай лартса чĕртни çинчен пĕлсен чун-чĕре хĕпĕртенĕччĕ. Нумаях пулмасть тĕл пулса калаçма тỹр килчĕ унпа. Мĕн чухлĕ ăшăлăх, сăпайлăх палăрать çак хĕрарăмра. Такампа та пĕр чĕлхе тупма пĕлет вăл. Пурне те пулăшма хатĕр - ĕçĕпе те, вырăнлă сĕнỹ-канашпа та.
Пурнăç урапи çăмăллăнах чупман Глафира Ивановнан. "Паха тĕрĕ" фабрикăра пуçланнă унăн ĕç стажĕ. Каярах чугун çул çинче те ĕçлесе пăхнă. Ял каччипе Г.Ивановпа çемье çавăрнă хыççăн Ураскассинче тĕпленнĕ. Колхозра ĕçлесех тивĕçлĕ канăва тухнă. Мăшăрĕпе 3 ача çуратса пурнăçăн анлă çулĕ çине кăларнă. Хĕрĕ Мая халĕ Хусанта ĕçлесе пурăнать. Пĕр ывăлĕ, Алеша, Шупашкарта, тепри - Игорь - ялтах хуçалăх çавăрнă. Шел, упăшки Геннадий вăхăтсăр пурнăçран уйрăлчĕ. Юратнă ачисемпе ултă мăнукĕ хуйха-суйха манма пулăшаççĕ Ира аппана. Ялта ăна пурте çапла чĕнеççĕ. Кичемлĕхе сирме çынпа ялан хутшăнни те пулăшать ăна. Клубри фольклор ушкăнĕнче юрласа киленĕç тупать. Çут çанталăка, йывăçсене, чечексене юратни те тĕрек парать, паллах.
Калаçуран Глафира Ивановна çывăх кунсенче çавра çулхи юбилейне кĕтнине те пĕлтĕм. Çирĕп сывлăхпа пысăк телей, пурнăçра нумай-нумай ыррине лайăххине курма, хăйне чунтан юратакан, хисеплекен çынсен ăшшипе савăнса пурăнма сунатăп ăна.
П.НИКИФОРОВ. Ураскасси ялĕ.