05 августа 2014 г.
Çул çинчи инкек пурне те хумхантарать ĕнтĕ. Асăннă лару-тăрура автоаварие лекнисем çухалса каяççĕ, полици ĕçченĕсене пĕлтермесĕр, сусăрланнине васкавлă пулăшу памасăр тарса пысăк йăнăш тăваççĕ.
Инкек пулнă вырăнтан кайнă транспорт хатĕрĕсене пĕрех хăвăрт тупаççĕ. Хăйĕн ĕçĕсене тивĕçлĕ шайра пурнăçлакан полицин опытлă сотрудникĕсем шыравра урамсенче вырнаçтарнă видеокамерăсен кадрĕсемпе те усă кураççĕ. Ĕçсене уçса парасси çулсерен лайăхлансах пырать çапла. Йĕркелĕх хуралçисене пĕлтермесĕр, аманнине пулăшу памасăр тарсан инкек тунă водителĕн транспортпа усă курмалли документне çулталăкран пуçласа çулталăк çурăллăха илеççĕ е 15 талăка ирĕкрен хăтараççĕ ăна. Инкекре пĕри кăшт та пулин сусăрлансан та вырăнтан пăрахса тарма юрамасть. Асăннă йĕркене уйрăмах руль умне ỹсĕрле ларнисем е çул çине документсăр тухнисем пăсаççĕ. Автоаварире çын йывăр суранлансан, пулăшу памасăр кайнисене административлă майпа ответ тыттараççĕ тата ун тĕлĕшпе уголовнăй ĕç те пуçараççĕ. Полици уйрăмĕн сотрудникĕсене кĕтнĕ чухне инкеке лекнисен эрех ĕçме, наркотикла япаласемпе усă курма юрамасть. Уншăн руль умне ỹсĕрле ларнă водителе айăпланă пек 1,5-2 çуллăха правасăр хăвараççĕ е 30000 тенкĕ штраф тỹлеттереççĕ. Инкек мĕнле вырăнта, кам айăпĕпе пулнине тĕпчеме ыттисене чĕнсе илет ГИБДД сотрудникĕ. Ку йĕрке - чи шанчăкли.
Инспекторсене нумай кĕтме тивнĕ чухне, инкекре никам та аманман е водительсем пĕр шухăшлă пулсан, автоавари вырăнне хăйсемех сăнласа çырма тата çакна çирĕплетсе алă пуснă хыççăн çывăхри ГИБДД уйрăмне çитме пултараççĕ. Схемăна лайăх ỹкермелле, унта пулни-иртни ăнланмалла курăнтăр. Пĕр утăм пĕр метрпа танлашнине асра тытăр ỹкернĕ чухне. Çул участокĕнче транспортсем хăш тĕлте, инкек хăçан, хăш вăхăтра пулнине, çапăннă вырăна, водительсен хушамачĕ, ячĕ, ашшĕ ячĕсене, транспортсен маркисене, регистраци номерĕсене, çапăннă хыççăн мĕнле пайсем çĕмĕрĕлнине çырса кăтартмалла. Сăн ỹкерчĕк пулмалла. Автоавари кам айăпĕпе пулнине те асăнмалла. Иккĕмĕш меле илсе кăтартрăмăр халь.
Виççĕмĕшĕнче те полици сотрудникĕсем хутшăнмасан та пултараççĕ. Кунта та аманнисем пулмалла мар, водительсем пĕр-пĕринпе килĕшỹллĕ ĕçлемелле. Инкеке лекнисенчен икĕ транспортран кая пулмалла мар, вĕсем ОСАГОра страхланнисем пулмалла. Сиен сумми 25000 тенкĕрен иртмелле мар. Çакнашкал лару-тăрура автомобилистсем инкек пирки пĕлтерме страхлакан фирмăна хăйсемех кайма пултараççĕ.
Пирĕн районти çул-йĕр çинче кăçал çичĕ уйăхра 9 инкек пулнă. Вĕсенчен иккĕшĕнче çынсем йывăр аманнă. Водительсенчен тăххăрăшне те РФ КоАП-ăн 12.27 статйин иккĕмĕш пайĕнче кăтартнă йĕркепе, административлă майпа айăпланă.
И.СКВОРЦОВА,полицин аслă лейтенанчĕ.