05 августа 2014 г.
Вăтаялĕнче модульлĕ фельдшерпа акушер пункчĕ туни çинчен район хаçатĕнче маларах та çырнăччĕ-ха, вулакансене строительство епле пулса пынипе паллаштарнăччĕ. Объекчĕ ку ял халăхĕшĕн питĕ кирлĕскер-çке. Çитменнине, вăл хут-хут тумалли япала та мар, çавăнпа ăна ку чухнехи норматив ыйтăвĕсене тата малашлăха тивĕçтермелле тума тăрăшаççĕ.Ĕç пахалăхне Тĕмер ял тăрăхĕн пуçлăхĕ Геннадий Иванович Иванов та, район администрацийĕн пуçлăхĕн çумĕ - пурăнмалли çурт йĕрпе çул-йĕр тата строительство пайĕн начальникĕ Анатолий Алексеев та тĕрĕслесех тăраççĕ, кирлĕ ыйтусене вăраха ямасăр татса пама пулăшаççĕ.
Çурта "Рослайн" подрядчик строителĕсем тăваççĕ. "Рослайнăн" тĕп бази Çĕнĕ Шупашкарта вырнаçнă пулсан, фельдшерпа акушер пунктне тăвакан строительсем Вăтаялĕнчех хваттерте пурăнаççĕ.
-Ирхине улттăран пуçласа каçхине тăхăр сехетчен стройкăра эпир,-хăйсен ĕç режимĕпе паллаштарчĕ Сергей Витальевич Сорокин прораб. Сирĕн хăвăрăн мĕнле специальноç тесен, чылай ĕçе пултарнине каларĕ. Унпа пĕрле халĕ кунта платниксен бригадирĕ Виталий Меркурьев, Сергей Сидоров, Вячеслав Сергеев, Александр Григорьев, Николай Александров платниксем тăрăшаççĕ. "Ĕçре кун кунлатпăр",-теççĕ. Кам леса (пусма) çинче вăр-вар ĕçлет, кам аялтан материалпа е ытти кирлĕ хатĕрсемпе тивĕçтерет - ĕç ỹсĕнсех пырать.
Федьдшерпа акушер пункчĕн çуртне ку чухнехи технологипе - йывăç каркассемпе тата пухмалли конструкциллĕ лаптак сендвич-панельсемпе хăпартнă. Малтан çуртăн кĕтессисене вырнаçтарнă, унтан - стенисене. Кĕтессене майлаштарса вырнаçтарма çăмăл пулманран хаш-ш сывласа янăччĕ ăстасем вĕсене вĕçлесен.
Ку вăхăт тĕлне çуртăн тăррине профнастилпа витнĕ, стенасене тулашĕнчен тимĕр сайдингпа сăрса тухнă, чỹречисене пластик кантăксем тата тимĕр алăк лартнă. Шалтан кабинетсем туса тухнă. Вĕсем сахал мар: фельдшерăн йышăну кабинечĕ смотровой кабинетпа пĕрле, процедура кабинечĕ прививка тумаллипе пĕрле, кĕтмелли пỹлĕм, персонал кабинечĕ, эмелсем упрамалли, тата инвентарь пỹлĕмĕсем, санузел тата ыттисем. Вĕсене кĕçех йĕркене кĕртсе çитерĕç: ăçта отделка ĕçĕсем тăвĕç, гипсокартон, плиткăсем çыпăçтарĕç, сăрлĕç, çурта кĕме пандус та тăвĕç. Эрне кунпа шăмат кун вара карниз тăватчĕç. Комплектпа пăхнă материалсемпе "Рослайн" тивĕçтернĕ.
Строительство хăвăртлăхне малтанхи вăхăтра Улатăр хули пăртак чарса тăнă, материалсене вăхăтра парайман. Анчах çакă та пысăк чăрмав мар, фельдшерпа акушер пунктне тăвасси вĕçленсе пырать.
Тĕмер ял тăрăхĕн администрацийĕ те хăй енчен тăрăшнă: канав чавтарса, "Канашмежрайгазăн" Тăвайри филиалĕнче ĕçлекенсемпе пĕрле пункта çут çанталăк газĕ илсе çитернĕ, шыв илсе пынă, ку эрнере свет та пулĕ, кăнтăрти электричество сечĕн ĕçченĕсем пулăшĕç ку енĕпе. Фельдшерпа акушер пункчĕ тавра тирпей-илем кĕртме Паснертен тăпра турттарнă. Халĕ хура тăпра тепĕр виçĕ КамАЗ илсе килесшĕн. Администраци пуçлăхĕ Г.Иванов кулленех кунта.
Таврари курăка çултарнă. Халĕ çуртăн хыçал енне паляска тытаççĕ. Умĕнче те çỹллĕ мар карта пулĕ. Унта ỹлĕмрен чечексем куçа илĕртĕç.
И.ГЛАДКОВ.