01 августа 2014 г.
Малтан пăрçа, унтан кĕрхи ыраш çапса илнĕ "Акконд-агро фирма" хупă акционерлă общество комбайнерĕсем.
Юн кун Вăтаяль çывăхĕнчи кĕрхи тулă пуссинче çаврăм хыççăн çаврăм турĕç. "Акконд-агро фирмăн" кĕрхи тĕш тырă культурисем пурĕ 344 гектар çинче, çав шутран 227 гектарĕ - кĕрхи тулă. Пăрçа кăçал кашни гектартан ампар виçипе 21, кĕрхи ыраш бункер виçипе 18,4 центнер тухăç панă пулсан, кĕрхи туллăн имĕ-сумĕ пĕчĕкрех пулассăн туйăнать, мĕншĕн тесен тырă сахалли куç кĕрет. Ытти çĕрти пирки сăмах тытмастăп. Анчах ку уйрине кĕркунне акма та кая юлса акнăччĕ. Çуркунне сỹрелени тата удобрени парса апатлантарни те кирлĕ пек вăй хушайманни курăнать. Çитменнине, çанталăкĕ типĕ тăчĕ-çке, кăçал шăрăх пĕр шелсĕр çунтарчĕ. Çĕр çуркаланса пĕтнĕ талккăшпе. Тен, ытти уйсенче тухăçлăрах? Кĕр тыррисем вĕт çурхи нỹрĕкпе вăй илсе юлаççĕ.
"Дон-1500" комбайсемпе "Акконд-агро фирма" предприяти уйĕнче Борис Ильинпа Андрей Александров, Вячеслав Семеновпа Владимир Васильев, Александр Суркинпа Юрий Яковлев механизаторсем ĕçлеççĕ. Хастар çынсем - пĕлетĕп вĕсене. Хăшĕсем, кирлĕ чухне, çу каçа темиçе тĕрлĕ техникăпа та вăй хума ĕлкĕреççĕ, нумай ĕçе пултараççĕ, ỹркенсе тăмаççĕ.
Тырри лайăх-и е начартарах - комбайнсем пĕрех чарăнса вăхăта çухатасшăн мар. Çавăнпа Борис Алексеевич Ильин комбайнерпа кабинăра калаçса пытăмăр. Вăл ытти чухне "Акконд-агро фирма" предприятире мастерта тата складсен заведующийĕнче тăрăшать. Маларах, чылай çул каялла, Ураскассинчи "Трудовой путь" колхоза ертсе пынăччĕ вăл. Халĕ вара, хĕрỹ вăхăт ыйтнипе, комбайн штурвалĕ умне ларнă. Сăмах майăн каласан, кунти комбайнерсемпе вĕсен пулăшаканĕсенчен çурри - ураскассисем.
Борис Ильинпа Вячеслав Семенова кашнине "Пучах" паллăпа район администрацийĕн дипломĕсене панă. Вĕсем иртнĕ юн кун тĕлне 1448 тата 1119 центнер тырă çапса тĕшĕленĕ. Çав ятпа вĕсене район администрацийĕн пуçлăхĕн пĕрремĕш çумĕ - АПК аталанăвĕпе экологи пайĕн начальникĕ Валерий Чайкин ăшшăн саламланă, ĕçре тата çемьере ăнăçусем, ăнланулăх суннă.
Çапса илнĕ тулла Николай Поликарповпа Николай Михайлов водительсем Амалăхри йĕтеме турттарса тăраççĕ. Унта ăна, паллах, тасатса хатĕрлеççĕ, сортлаççĕ.
Комбайн - кăткăс агрегат. Ванасси те пулать хĕрсе ĕçленĕ хушăрах. Çапла килсе тухрĕ те Суркинпа Яковлев ĕçлекен "уй-хир карапĕпе". Çийĕнчех ăна майлаштарса яма пикенчĕç. Хăйсемсĕр пуçне кунта Владимир Васильевпа Андрей Александров та тăрмашрĕç.
Вырма яваплă та хĕрỹ вăхăт çав.
И.ГЛАДКОВ.