01 августа 2014 г.
Тавралăха кĕрхи сăн çапнă вăхăтра, çурла уйăхĕнче, çулленех çуллахипе кĕрхи сунар уçăлать. Çакă вăл йăланах кĕнĕ темелле.
Кăçал та августăн 16-мĕшĕнче ирхи шуçăмпа сунара тухма ирĕк параççĕ, мĕншĕн тесен асăннă кунран Чăваш Республикинче, вăл шутрах пирĕн район территорийĕнче те, çуллахи-кĕрхи сунар вăхăчĕ пуçланать. Вăл кăçалхи чỹк (ноябрь) уйăхĕн 15-мĕшĕчченех тăсăлать. Çавна май сунарçăсен мĕнле йышши вĕçен кайăксем тата пĕр кунта мĕн чухлĕ тытма юрать-ха? Виçине палăртнă - шывра ишекен кайăк кăвакалĕсене кунне пиллĕк, хур кайăксене иккĕ тытма юрать. Ула курака вара сунарçă мĕн чухлĕ тытма пултарать çавăн чухлĕ - ку тĕлĕшпе чару çук.
Анчах сунарçăн кỹлĕсемпе юхан-шывсен хĕррине пăшал çакса тухиччен малтан полицирен пăшалпа çỹреме ирĕк пани пулмалла, сунар билетне те йĕркене кĕртмелле, çакăн хыççăн тин пулăçсемпе сунарçăсен районсем хушшинчи обществинчен сунара çỹреме ирĕк паракан хут, путевка илмелле. Тỹлевлĕ путевкăна çак адреспа параççĕ: Канаш хули, Тăвай урамĕ, 1-мĕш çурт. Ăна шăмат кунпа вырсарнисĕр пуçне кашни кун 8 сехетрен пуçласа 17 сехетчен çырса параççĕ.
Хăшĕ-пĕрин сунартан пушă кутамккапа та таврăнма тивĕ. Анчах ку пĕртте ỹкĕнмелле пулмĕ. Çут çанталăк ытамĕнче пулни, сунар уçăласса кĕтсе кăвайт умĕнче пĕр-пĕринпе шăкăл-шăкăл калаçса ларни хăех мĕне тăрать. Чи кирли, ухатана тухсан, сунар йĕркисене пăсни ан пултăр.
В.СОРОКИН, аслă егерь.