01 августа 2014 г.
Район прокуратури ирĕклĕхе туртса илессипе çыхăнман, условнăй айăплавсене пурнăçа кĕртнĕ е айăплав вăхăтне куçарнă чухне законсене пăхăнса тăнине куллен тимлĕхре тытать. Айăпланă çынсене учета тăратнă, айăплав вăхăтне ирттернĕ чух вĕсем хăйсене кирлĕ пек тытаççĕ-и, закона пăсмаççĕ-и, айăплавран пăрăнмаççĕ-и, пурте закон йĕркипе пулса пырать-и тата ытти ыйтусенче тĕп пĕлтерĕш пама тăрăшнă прокуратура тĕрĕслевсен вăхăтĕнче.
Ирĕклĕхе туртса илессипе çыхăнман айăплавсенче районти пĕрремĕш çур çулта 54 çын учетра тăнă. Вĕсем хушшинче обязательнăй ĕçсене явăçтарнисем те, пĕр-пĕр должноçа йышăнма пултарайман е хăш-пĕр ĕçсенче ĕçлеме юраман, ирĕклĕхне чарак панă, условно айăпланнă çынсем те пур. Тĕрĕслевсен вăхăтĕнче закона пăснă тĕслĕхсем тупса палăртнă.
Çапла РФ УКн 139 статйин 1-мĕш пайĕпе айăпланнă Н.Васильева Тăвай ял тăрăхĕн администрацийĕнчи обязательнăй ĕçсене явăçтармалла пулнă, анчах айăпланакан темиçе кун ĕçе тухман. Ял тăрăхĕн администрацийĕнчи должноçри çын вара çавăн пирки инспекцие те (УИИ), район прокуратурине те пĕлтермен. Йĕркене пăснă тĕслĕх тĕрĕслев вăхăтĕнче кăна палăрнă. Айăпланакана обязательнăй ĕçсене ирĕклĕхсĕр хăварассипе улăштарма пултарасси çинчен асăрхаттартăмăр, анчах тепĕр темиçе кунран вăл каллех ĕçе тухман. Инспекцие каллех пĕлтерсе хуман. Айăпланакан вара ĕçкĕпе иртĕхнĕ, обществăри йĕркелĕхе пăснă. Инспекци Н.Васильев тĕлĕшпе обязательнăй ĕçсене ирĕклĕхсĕр хăварассипе улăштарас ыйтупа районти пĕрремĕш суд участокне представлени тăратрĕ. Анчах миравай судья ăна тивĕçтермен пирки прокурор судья постановленине пăрахăçлаттарчĕ. Прокурор ял тăрăхĕн администрацийĕнчи должноçри çын тĕлĕшпе те представлени çырчĕ.
Ирĕклĕхне туртса илмесĕр айăпланнă тăватă çыннăн кăçал йĕркене сĕмсĕррĕн пăснăшăн айăплав вăхăтне юсанмалли колонире ирттерме тивет.
42 çулхи В.Емельянова 2 çулталăка условно айăпланă пулнă. Çавах та вăл тỹрленес çул çине тăма шутламан, обществăри йĕркелĕхе тăтăш пăснă, ỹсĕрле çапкаланса çỹренĕ, ĕçе вырнаçма шутламан. Вăрмар районĕн сучĕ В. Емельяновăн условнăй айăплавне пăрахăçларĕ, ăна 2 çуллăха колони-поселение яма йышăнчĕ.
Полици сотрудникĕ пулнă çынна хулиганла ĕçĕшĕн судпа айăпласа унăн ирĕклĕхне хăш-пĕр чараксем панăччĕ. Миравай судья айăплав вăхăчĕн юлнă пайне - 1 уйăх та 18 кун - айăпланакана ирĕклĕхсĕр хăварас пирки приговор кăларчĕ. Мĕншĕн тесен айăпланакан суд палăртнă условисене пăхăнман.
Суд приговорĕсемпе палăртнă тивĕçсене пурнăçласа пыман 5 çыннăнне тĕрĕслев вăхăтне тăснă, айăпланнă 4 çынна ытти тивĕçсем хушса панă.
Çапла 36 çулхи Ю.Кириллова ирĕклĕх тĕлĕшпе 11 уйăха чараксем панă. Айăпланакан вара вĕсене пăснă, вăл юлташĕсемпе ĕçнĕ те ỹсĕрпе алă çинчи электронлă сулăна çапса çĕмĕрнĕ. Йĕркене пăсакана 5 талăка арестленĕ. Вăрмар районĕн суд представленийĕпе унăн тивĕçĕсем татах хушăннă. Унăн халĕ эрех тултарса сутакан, çынсем массăллăн пулакан вырăнсенче çỹреме, каçхине 22 сехетрен пуçласа ирхине 6 сехетчен килтен тухма юрамасть.
Судпа айăпланнă, анчах ирĕклĕхре хăварнă А.Шарапов кăçал Шупашкарта власть представителĕ тĕлĕшпе вăйпа усă курнă. Шупашкарти Ленински район сучĕн йышăнăвĕпе ăна 2 çуллăха условно ирĕклĕхсĕр хăварма йышăннă.
Тишкерсен, çакă курăнать: ял тăрăхĕсен пуçлăхĕсем судпа айăпланнă çынсем хушшинче ăнлантару ĕçне вăйсăрлатнă. Çитменлĕхе пĕтерес тĕллевпе вĕсене хушма мерăсем палăртса хатĕрлеме сĕннĕ.
О.ЯСТРЕБОВА, район прокурорĕ.