01 августа 2014 г.
Тин кăна районти шкулсенче юлашки шăнкăрав янăранăччĕ пек. Анчах тахăш самантра пĕрлехи патшалăх экзаменĕсем, вĕренсе тухакансен каçĕсем, хыçа тăрса юлчĕç. Çĕнĕ вĕренỹ çулĕ пуçланиччен юлнă вăхăт тепĕр уйăхран та катăлчĕ. Мĕнле хатĕрленеççĕ-ха вĕренỹ учрежденийĕсенче 2014-2015 çулхи вĕренỹ çулне? - çавăн çинчен каласа пама эпир район администрацийĕн пуçлăхĕн çумне-вĕрентỹ пайĕн пуçлăхне Олег Анатольевич Ломоносова ыйтрăмăр.
Районти вĕрентỹ ĕçĕ наци проекчĕпе, Чăваш Республикин вĕрентỹ ĕçне аталантармалли Стратегипе килĕшỹллĕн пулса пырать. Пирĕн тĕп тĕллев - çамрăк граждансене пахалăхлă пĕлỹпе воспитани илме тан майсем туса парасси. Çак тивĕçе район территорийĕнчи 23 вĕрентỹ учрежденийĕ, çав шутра пĕтĕмĕшле пĕлỹ паракан 10 шкулпа шкул çулчченхи ачасен 9 учрежденийĕ, хушма вĕрентĕвĕн 3 тата психологпа педагог, медицинăпа социаллă пулăшу кирлĕ ачасен вĕрентỹ учрежденийĕ пурнăçласа пыраççĕ. Шкул çулĕчченхи ачасен вĕрентỹ учрежденийĕсенче 1,5 çултан пуçласа 7 çула çитичченхи ачасен 62 проценчĕ воспитани илет. Унсăр пуçне Элпуçпе Чутей шкулĕсенче ачасен кĕске вăхăтлăх пулмалли 2 ушкăн йĕркеленĕ. Çапла вара 1 çулталăкран пуçласа 7 çулчченхи ачасен 68,6 процентне шкул çулĕчченхи учрежденисемпе тивĕçтернĕ. Садик черетĕнче тепĕр 273 ача, çав шутра 1,5 çултан пуçласа 3 çулчченхисем - 143.
Пĕтĕмĕшле пĕлỹ паракан шкулсенче 1752 ача вĕренет (2012-2013 вĕренỹ çулĕнче - 1830). Пур шкул та лицензипе ĕçлет. Классенче вăтамран 13,9 вĕренекен е кашни учителе 10,2 ача тивет. Аслă классенче профиль вĕрентĕвне йĕркеленĕ.
Вĕренекенсен 98,01 проценчĕ патшалăх аттестацийĕ витĕр тухнă. Икшер çамрăк математикăпа тата вырăс чĕлхипе пĕрлехи патшалăх экзаменĕсенче чи пĕчĕк балл пухмалли шая çитейменнипе аттестат илеймен. Асăннă предметсемпех вăтам балл шайĕ чакса пырать. Патшалăхăн пĕтĕмлетекен аттестацийĕн кăтартăвĕсем тăрăх 11-мĕш класран вĕренсе тухнă 135, 9-мĕш класран вĕренсе тухнă 197 çамрăка аттестатсем панă. Çав шутран 22 тата 9 çамрăкăн аттестачĕсенче питĕ лайăх паллăсем тăраççĕ.
Педагогсем пултаруллă ачасемпе уйрăмшар ĕçлессине йĕркеленĕ, унăн çимĕçĕсем кĕттермеççĕ. Районти 48 вĕренекен республикăри олимпиадăсенче 72 хутчен шкул тата район чысне хỹтĕленĕ. 11 предметпа çĕнтерỹçĕ пулса тăнă е малтисен шутне кĕнĕ (2010 çулта - 10, 2011 ç. - 10, 2012 ç. - 9, 2013 ç. - 13). Çав шутра технологипе тата географипе - 2 вырăн, биологипе, правăпа, физкультурăпа, обществознанипе, вырăс чĕлхипе, экологипе, чăваш чĕлхипе - пĕрер. Тăвайри вăтам шкулти О.Лебедева технологипе тата Е.Неофитова экологипе Пĕтĕм Раççейри олимпиадăсен юлашки тапхăрĕнче малтисен шутне кĕнĕ, иккĕмĕшĕ çĕнтерỹçĕ пулса тăнă.
12 шкул автобусĕ 18 ялтан 492 вĕренекене ирсерен уроксене ĕлкĕртет, вĕсем вĕçленсен - каялла леçет.
Пур шкулта та вĕренекенсене вĕри апат çитереççĕ, унăн хакĕ вăтамран - 18 тенкĕ. Тупăш сахал илекен, социаллă хăрушлăха кĕрсе ỹкнĕ çемьесенчи ачасем (22) çăмăллăхпа усă курнă. 2014 çулта çав тĕллевпе 80 пин тенкĕ уйăрнă.
Ачасен пултарулăхне аталантарас ĕç хушма вĕрентỹ тата пĕтĕмĕшле пĕлỹ паракан учрежденисен никĕсĕ çинче пулса пырать. Хушма вĕрентỹ учрежденийĕсем районта виççĕ - ачасемпе çамрăксен пултарулăх центрĕ, искусствăсен шкулĕ тата "ДЮСШ-"Аль" ФСК. Хушма вĕрентĕве ачасен 73 процентне явăçтарнă.
Çĕртме уйăхĕнче районти пур шкулта та сывлăха çирĕплетекен, ĕçпе кану тата профиль (5) лагерĕсем ĕçленĕ, 16 лагере 295 вĕренекене явăçтарнă. Район тулашĕнчи лагерьсенче 1-мĕш сменăра 12 ача сывлăха çирĕплетнĕ.
Педагогсен кадрĕсем çителĕклĕ. Вĕсен 95 проценчĕ аслă пĕлỹллĕ, 5 проценчĕ ятарлă вăтам пĕлỹ илнĕ. Вĕрентекенсен 15 проценчĕ - пенсионерсем, 6 проценчĕн ĕç стажĕ 5 çултан иртмен. Кăçалхи I çур çулта 11 ĕçчене аттестациленĕ, çав шутран 2 çын аслă, 9 çын пĕрремĕш категорие тивĕçнĕ. Педагогсен 17,4 проценчĕн аслă, 74,5 проценчĕн - пĕрремĕш категори.
Вĕрентекенсен уйăхри вăтам ĕç укçи 24645,4, шкул çулчченхи учрежденисенче ĕçлекенсен 20306, хушма вĕрентỹре - 15513,6 тенкĕ. Класс ертỹçи пулнăшăн уйăха 1000 тенкĕ хушса тỹлеççĕ.
Кăçал ноябрĕн 1-мĕшĕ тĕлне Тăвайра 8 ушкăн вырнаçмалăх садик çуртне хута яма пăхнă. Кăçалтан садик черетне пĕтерме май пулĕ.
Паянтан районти вĕрентỹ учрежденийĕсене 2014-2015 вĕренỹ çулне хатĕрленине тĕрĕслемелли тапхăр пуçланать. Комисси паян Мучарпа Тăвайри вăтам шкулсене тата çав ялсенчи садиксене тĕрĕслет.
Федераллă бюджетран сывлăх тĕлĕшĕнчен кăлтăк пур ачасем валли ятарлă хатĕрсем туянма республикăна 59,5 млн. тенкĕ уйăрнă. Республика шкулсенче тĕп юсавсем тума тепĕр çавăн чухлĕ сумма уйăрать. Унпа республикăри 36 шкулта усă курĕç, çав шутра пирĕн районти Тушкил шкулне те 1,6 млн. тенкĕ тивĕçнĕ. Асăннă шкулта халĕ юсав ĕçĕсем пыраççĕ.
"Единая Россия" партин "Ача-пăча спорчĕ" проект шучĕпе Йăнтăрчă шкулĕнче спорт залне тĕпрен юсама тытăннă, çавăн пекех çурт тăррине, чỹрече блокĕсене улăштарасшăн.
Ытти шкулсенче - çулленхи юсав. Тăрмăш, Тĕмер, Чутей тата Тушкил шкулĕсенче медицина кабинечĕсене юсас ĕçсем вĕçленсе пыраççĕ, вĕсенче оборудованисем вырнаçтарма пуçланă.
Шкулсене хутса ăшăтмалли сезона хатĕрлес ыйтусем те тимлĕхре.
И.СОЛОВЬЕВ калаçнă.