01 августа 2014 г.
Июлĕн 28-мĕшĕнче Руç тĕне кĕнине уявламалли кун пулчĕ. Тушкилсем вара çак куна çулленех анлăн паллă тăваççĕ.
Вĕсен чиркỹ престолĕ шăпах апостолсемпе тан Владимир кнеç ячĕллĕ. Кăçал та ял чиркĕвĕнче ирхине уяв ячĕпе кĕлĕ пулчĕ, унта таврари чиркỹсен пачăшкисем те хутшăнчĕç.
Служба хыççăн Ямпулатри Аслă пахчара уявпа çыхăннă культурăпа спорт мероприятийĕсем иртрĕç. Пухăннисене Тушкил ял тăрăхĕн пуçлăхĕ П.Захаров ăшшăн саламларĕ, кулленхи ĕçре ỹсĕмсем, пурнăçра ырлăх-сывлăх сунчĕ. Ялти "Сурпан" фольклор коллективĕ концерт лартса пачĕ. Владимирски уявне пĕчĕк "çăлтăрсем" те илем кỹчĕç. Концерт темиçе сехете тăсăлчĕ. Куракансем артистсене алă çупса хавхалантарчĕç, тав турĕç. Вĕсем хушшинче хăнасем те пулчĕç. Уявра ал ĕç ăстисен куравне те йĕркелерĕмĕр. Çамрăксем спорт мероприятийĕсене хастар хутшăнчĕç, футболла, волейболла вылярĕç. Волейбол - тушкилсен чи юратнă вăййи, вĕт ялтан сахал мар пултаруллă волейболист тухнă. Ку енĕпе В.Захаров тренерпа Чăваш Республикин тава тивĕçлĕ учителĕн Н.Давыдовăн тỹписем чăннипех пысăк. Мала тухнисене пурне те ял тăрăхĕн администрацийĕпе тулли мар яваплăхлă "Шимкусский" общество директорĕ А.Моряков хаклă парнесем парса хавхалантарчĕç. Уяв лапамĕнче кунĕпех суту-илỹ ĕçлерĕ, унта куллен кирлĕ таварсем, пылак çимĕçсем, тутлă шывсем сутрĕç. Ташă каçĕ вара ирчченех тăсăлчĕ. Ял-йыш уявра савăнчĕ, чунпа канчĕ.
Н.КАМАСЕВА.