01 августа 2014 г.
Пирус туртни сывлăха хавшатнă тата пурнăçа кĕскетнĕ пирки пĕрре çеç мар çырнă ĕнтĕ. Вăл пирус туртакансемпе пĕр кил-çуртра е юнашар пурăнакансемшĕн те сиенлĕ. Çакăнта çырнисене çирĕплетсе вун-вун тата çĕр-çĕр тĕслĕх илсе кăтартма пулать.
Вĕçĕм туртакансен çăмăллăнах ỹпке ракĕ аталанма пултарать. Пирус тĕтĕмĕ-наркăмăшĕ ытти органсене те усал шыçăпа е ытти йывăр чирсемпе чирлеттерет. Нумай йывăр чиртен сывалма та хĕн, усал шыçăсенчен вара - пушшех те. Çав вăхăтрах пурнăç пурин те пĕрре килет. Апла пулсан, пирĕнтен кашнин сывă пурнăç йĕркине мала хумалла. Сиенлĕ йăласене пăрахма вара (пирус мăкăрлантарни те çав шута кĕрет) çирĕп кăмăл, тĕллевшĕн çине тăма пултарни кирлĕ. Усăллă ĕçе, спорта явăçмалла. Çителĕклĕ çывăрмалла. Рациона ỹсен-тăрантан хатĕрленĕ апат-çимĕç, сĕт юр-варĕ кĕртмелле. Аш та пултăр виçеллĕ. Çаксем пурте сывлăха çирĕплетĕç.
Т.ИГНАТЬЕВА,Тăвайри больницăн тĕп врач çумĕ, нарколог.