29 июля 2014 г.
2010 çултанпа республикăра пурăнакансен вăтам ĕмĕрĕ тепĕр 2 çул вăрăмланнă, прогноз тăрăх кăçал вăл 70,7 çулпа танлашмалла. Обществăри политикăпа социаллă лару-тăру тăнăç пулнипе те çыхăннă ку, çынсен: "Ыран мĕнле пулĕ ĕнтĕ?" тесе пăшăрханмалла мар. Иртнĕ çул нумай ачаллă - 3-5 ача - çемьесен шучĕ 11 процент ỹснĕ, çавна май республикăра халăх йышĕ те 1027 çын хушăннă. 2011-2013 çулсенче республикăра 23 садик хута янă, кăçал тепĕр 14 садик ĕçе кĕртмелле, çав шутран пĕри - Тăвайра. 2011-2015 çулсенче республикăра çĕнĕрен тунă е юсаса лайăхлатнă 49 садик çуртне хута яма пăхаççĕ, ку вара шкул çулне çитмен 20 пин ытла ачана садике çỹреме май туса парать. Çапла майпа республикăра садик черетне пĕтересшĕн.
Иккĕмĕш ача çуралсан çемьене Раççей бюджетĕнчен амăшĕн капиталне 429408 тенкĕ, виççĕмĕш ача çуралсан республика бюджетĕнчен тепĕр 100 пин тенкĕ хушса тỹлени, шкул çулне çитмен ачасене садиксемпе, çамрăк çемьесене патшалăх хваттер туянма е çурт-йĕр çавăрма укçа-тенкĕ парса пулăшни тата ытти мерăсем çĕр-шыври демографи политикине ырă витĕм кỹреççĕ.
Пирĕн районта та акă иртнĕ эрнере ЗАГС пайĕн залĕнче савăнăçлă лару-тăрура йĕкĕреш ачасене регистрациленĕ.
Катьăпа Роман Михайловсен çемйинче пирвайхи ачасем - йĕкĕреш ывăлсем кун çути курнă. Ильяпа Денис Михайловсене пурнăçри пĕрремĕш документне - çуралнине ĕнентерекен документа ачасен ашшĕ-амăшне панă.
Сăмах май калас-тăк, йĕкĕрешсем кашни çулах килмеççĕ çут тĕнчене. Юлашки хут вĕсене районта 2011 çулта регистрациленĕ.
Редакцирен.