29 июля 2014 г.
Уй-хир ĕçĕсене çухатусăр ирттересси, хутмалли сезона хатĕрленесси, шкулсене çĕнĕ вĕренỹ çулне хатĕрлесси, нумай хваттерлĕ çуртсене харпăр хăй хутса ăшăтасси çине куçарасси - паянхи чи çивĕч ыйтусем.
Вăхăт кĕр енне сулăнчĕ. Районти чылай хуçалăх вырма ĕçĕсене пуçăннă. Ĕнерхи кун тĕлне 490 гектар çинчи тĕш-тырă тата пăрçа йышши культурăсене çулса пăрахнă е вырса илнĕ, вăтам тухăç хальлĕхе гектартан 17 центнерпа танлашать. 3560 тонна утă (100) процент), 8811 тонна сенаж (100 процент), 380 тонна силос (3,4 процент) хатĕрленĕ. Апат единици çине куçарсан кашни условнăй выльăх пуçне 17,3 центнер тивет.
Хутмалли сезона хатĕрленес, район центрĕнчи нумай хваттерлĕ çуртсене харпăр хăй хутса ăшăтасси çине куçарас ыйтусем администрацире кулленхи тимлĕхре. Çак эрнере Ленин проспектĕнчи 50-мĕш çуртра пурăнакансемпе ку ыйтупа пуху ирттерме пăхнă. Вăтаялĕнче фельдшерпа акушер пунктне тăвас ĕçе хăвăртлатма, çĕнĕрен тăвакан объект территорине тата яла тирпей-илем кỹрес ĕçсене пĕрлех туса пыма кирлине палăртрĕç.
Шкулсем çĕнĕ вĕренỹ çулне мĕнле хатĕрленнине августăн 1-мĕшĕнчен комисси тĕрĕслеме тытăнать.
Иртнĕ шăмат кун сывлăхпа спортăн Пĕрлехи кунĕ пулчĕ, çав кун "Аль" ФСКна 117 çын пынă.
Полицин районти уйрăмĕн пуçлăхĕн çумĕ Б.Борисов, районăн тĕп врачĕ Н.Бурдасова, надзор ĕçĕсен уйрăмĕн начальникĕ В.Михайлов яланхи пекех васкавлă службăсен иртнĕ эрнери ĕçĕ-хĕлĕпе паллаштарнă. Административлă комисси председателĕ В.Чайкин пĕлтернĕ тăрăх, ял тăрăхĕсен территорийĕсене таса тытас тата тирпей-илем кĕртес ĕçсене вырăна тухса тĕрĕслеме пуçлаççĕ.
Планеркăра район аталанăвĕн ытти ыйтăвĕсене те сỹтсе явнă.
Г.ЕГОРОВА.