29 июля 2014 г.
Чăваш Ен Пуçлăхĕ Михаил Игнатьев право йĕркипе тивĕçтерессипе ĕçлекен Координаци канашлăвĕн ларăвне ирттернĕ.
Алкоголь тата спиртлă шĕвексем сутассипе законсене пурнăçласа пырас ыйтусене республика правительстви куллен тимлĕхре тытнине палăртнă. Вăл, аптекăсен сечĕсем вĕсенче спиртлă шĕвексем сутма чарасси пирки меморандум çырнă пулин те юлашкинче тунă килĕшỹсене пăхăнманни çинчен аса илтернĕ. "Аптека сечĕсем, харпăр çыннăн вĕсем е патшалăхăн, сиплĕ препаратсем сутма тивĕç. Услама наркăмăшлă препаратсем сутса тумалла мар. "Фанфуриксем" йỹнĕ, анчах çынсем ăна ĕçсе сывлăха пĕтереççĕ, кайран сипленме хаклă йышши эмелсем туянса çемье бюджетне тăкак кỹреççĕ",- тенĕ республика Пуçлăхĕ.
Экономика аталанăвĕпе промышленность тата суту-илỹ министрĕ Владимир Аврелькин пĕлтернĕ тăрăх, кăçалхи I çур çулта суту-илỹпе обществăлла апатланăвăн 50 объектĕнчен 7 пин кĕленче контрафактлă алкоголь продукцийĕ туртса илнĕ, 4 организацинне эрех сутмалли лицензине чарса лартнă (йĕркесĕрлĕхе пĕтернĕ хыççăн тин тепĕр хут ирĕк панă). Тĕрĕслев хыççăн 732 декалитр алкоголь продукцине пăрахăçланă. Асăннă мерăсем республикăна суя акцизлă эрех пырса кĕрессин çулне пỹлнĕ, çавна май спиртлă шĕвексемпе наркăмăшланасси те чакнă.