29 июля 2014 г.
"Çамрăк учительсем яла килнĕ",-терĕç Сăхăтпуç шкулĕнче вĕренỹ çулĕ пуçланас умĕн. 1984 çулта пулнăччĕ ку.
Вĕсенчен пĕри - Галина Керимовна Ухтиярова, халь вара упăшкин хушамачĕпе Яковлева. Хăй вăл Шăмăршă районĕнчен.
Хитре, çỹллĕ, сарă та вăрăм çỹçлĕ хĕр математика предметне вĕрентет. Пур енĕпе те килĕшỹллĕ, ăслă-тăнлă, анлă,тавра курăмлă, ĕçчен. Ачасене юратать, хăйĕн предмечĕпе тĕрлĕ меслетсемпе интереслентерет.
Предмет йывăр, пур ачана та пĕр шай пĕлỹ пама çăмăл мар, апла пулин те хастар ĕçлет, пĕтĕм вăйĕпе вĕренекенсене çирĕп пĕлỹ пама тăрăшать. "Пушă вырăн çынни пулман вăл," -теççĕ ун пеккисем пирки. Хастарлăхĕпе çирĕплĕх туйăмĕ мĕн ачаранах çирĕпленнĕ унра. Института вĕренме кĕриччен колхозра дояркăра ĕçлени те çакна çирĕплетет.
Хаваслă çамрăклăх... Сăпай хĕре маттур каччă куç хывать. Михаил Анатольевичпа вăйлă туй туса çирĕп çемье çавăрчĕç. Мăшăрĕ пур енĕпе те ăста çын. Çĕнĕ вырăнта кермен пек çурт çĕклерĕç, хĕрпе ывăл çуратса ỹстерчĕç. Зойăпа Анатолий халь аслă пĕлỹллĕ, ашшĕ-амăшĕ пекех пултаруллă, ăслă çынсем, хăйсен мăшăрĕсене тупрĕç.
Вăхăта усăсăр ирттерме юратмасть Галина Керимовна. Пушăрах чух культура çуртĕнче ал-ăстисен кружокне йĕркелесе пырать, хитре çыхать, тĕрлет, хор кружокне хастар хутшăнать. Ял тăрăхĕн депутачĕ те вăл.
Ял пурнăçĕшĕн чунне парса ĕçлет, урамсене тирпей-илем кĕртессишĕн, шыв пăрăхĕсене юсавлă тытассишĕн тăрăшать. Ял халăхĕ хисеплет ăна.
Июлĕн 29-мĕшĕнче пирĕн юратнă çыннăмăр 55 çул тултарать. Çак хушăра хура пĕлĕт карса илни те, шиклĕ шухăш пуçа пăчăртани те, йывăр сывлăш кăкăра хĕсни те пулнă пуль... Тỹснĕ, чăтнă, хĕрарăм Маттур!
Сỹнмен-ха унра хĕлхем, паян кун та вăл ĕçре, юратнă юлташĕсемпе, тăванĕсемпе, хаклă ачисемпе, çумри савнă мăшăрĕпе. Апла пулсан саламлар-ха ăна юбилей ячĕпе пĕтĕм ял-йышпа чун-чĕререн, малашлăхра ыр сунса.
Г.НЕОФИТОВА,педагогика ĕçĕн ветеранĕ.