18 июля 2014 г.
Виçĕм кун "ДЮСШ-"Аль" ФСК стадионĕнче республикăри пушар чаçĕсен зонăри ăмăртăвĕсем пулчĕç.
Тăвай тĕмĕнче кил хуçисемсĕр пуçне Патăрьелĕнчен, Комсомольскинчен, Шăмăршăран, Елчĕкрен килнĕ командăсем тупăшрĕç. Участниксене Тăвай район администрацийĕн ертỹçи В.Ванерке, ăмăртусен тĕп судйи - шалти службăн подполковникĕ А.Серебряков саламласа ăнăçусем суннă.
Программăра Тăвайри 45-мĕш пушар чаçĕнчи башньăн 4-мĕш хутне вăрăм пусмапа хăпарасси, 100 метрлă чăрмавсен тăрăхĕпе иртесси, расчета вут-кăварпа кĕрешме хăвăрт хатĕрлесси пулнă. Пур операцие те кĕске вăхăтра тата пахалăхлă пурнăçлама тивнĕ.
Ăмăртусенче тăвайсем 1-мĕш вырăн йышăннă. Вĕсем республикăри ăмăртусенче çулленех лайăх кăтартусем тăваççĕ, малти вырăнсене тухаççĕ. 2-мĕшне комсомольскисем, 3-мĕшне елчĕксем тухнă. Харпăр хăй хушшинче ăмăртассипе Тăвай командинчи Александр Ананьев водитель уйрăмах палăрнă. Вăл стена çумне тăратнă пусмапа 4-мĕш хута хăпарассипе 1-мĕш, чăрмавсем витĕр тухассипе 2-мĕш вăхăт кăтартнă.
Çĕнтерỹçĕ командăна МЧСăн республикăри управленийĕн представителĕ В.Укладов саламласа ăнăçусем суннă, Хисеп грамотипе наградăланă. Тăвайсем район чысне республикăри финалти ăмăртусенче хỹтĕлĕç, вĕсем Етĕрне хулинче иртеççĕ.
В.АНАНЬЕВ