01 февраля 2011 г.
Чăваш Енри Роспотребнадзор пĕлтернĕ тăрăх пирĕн республикăра грипп чирĕ алхасма пуçланă.
Пăрачкав районĕнчи Ряпино ялĕнчи вĕренекенсем те килте лараççĕ. Чăваш Ен тĕп хулинчи 55, 60, 35 шкулсене пĕлÿ пухма çÿрекенсем те грипп “серепине” лекнĕ.
Иртнĕ эрнере чирлеслĕх Тăвай районĕнче, Çĕнĕ Шупашкарта чи пысăкки пулнă. Январĕн 24-мĕшĕнче районта 109 тĕслĕх пулнă, 25-мĕшĕнче – 96, тепĕр кунне 67 çын вируслă инфекци чирĕпе аптăранă. Врачсем патне кайма васкаманнисем те пур-ха тата. Район центрĕнчи ача садне, Тăвайри, Тăрмăшри вăтам шкулсене ачасем нумай чирленипе карантина хупнă эрнекун.
Çавăнпа ку енĕпе районта пурăнакансене питĕ тимлĕ пулма сĕнес килет. Чир паллисем пуçлансанах тухтăрсем патне йышăнăва васкăр.