21 декабря 2010 г.
Кашни çын хăйне май маçтăр. Хăв пĕлетĕн пулсан, ыттисене кăтарт, вĕсем те вĕренччĕр. Çапла шутласа Чутейри хĕрарăмсен пĕр ушкăнĕ ялти библиотекăна пухăнчĕ. Ку ĕçĕн пуçаруçи Вера Васильевна Юркина пулчĕ. Учитель-пенсионер вăрçăпа ĕç ветеранĕсен вырăнти советне ертсе пырать.
Тĕрлĕ професси çыннисем пуçтарăнчĕç. Людмила Васильева, Елизавета Шамбулина, Вера Янбашева, Наталья Самарина – хуçалăх ĕçченĕсем, Светлана Цырульникова – ветеринар, Воля Волкова – культработник, Светлана Майорова – вĕрентекен, Елена Васильева – библиотекарь, Валентина Куприянова – муниципаллă служащи тата ыттисем.
Занятие хитре çыхма вĕренессине халалларĕç. Камăн алса-нускийĕ тĕрлĕ эрешсемпе илемлĕ, теприсен тапочкийĕ ăшă та тăпăл-тăпăл. Пĕр-пĕрин ăсталăхĕпе паллашса пĕр занятирех темĕн чухлĕ çĕнни, усăлли илчĕç хĕрарăмсем. Клубăн черетлĕ занятине Тăвайри халăх музейĕн директорĕ С.Сергеева хутшăнчĕ. Светлана Архиповна кружока çÿрекенсене тутăр çыхмалли тĕрлĕ эреш кăтартрĕ.
Ал ĕç кружокне Е.Шамбулина ертсе пырать.
Сăн ÿкерчĕкре: ал ĕç кружокĕн занятийĕнче.