08 июня 2010 г.
“Çак черккене ĕç те ăшăнан е ыратни иртсе каять”, – тесе вăйпах эрех сĕнеççĕ хăш-пĕрисем. Алкогольлĕ шĕвек тĕрлĕ чиртен сывалма, кăмăл-туйăма çĕклеме пулăшать тесе шухăшлакансем те пур. Теприсем апат умĕн пĕрер черкке ĕçессине йăлана кĕртнĕ. Йăнăшаççĕ-ши вĕсем е тĕрĕс шухăшлаççĕ. “Çын ÿт-пĕвĕнчи кашни органа эрех сиен кăна кÿме пултарать. Пĕр-пĕр чиртен сыватмалли пахалăх çук унăн”, – текен резолюци йышăннă вырăс врачĕсен съездĕнче ĕлĕк. Алкогольлĕ шĕвек усăллă тесе шухăшлакансем йăнăшаççĕ эппин. Пĕр черкке ăша янă хыççăн апат çиес килни ĕçсе янă спирт юнра сарăлса пĕтиччен кăна. “Эрех ĕçес йăла пирĕн хушăра тарăн тымар янă. Çынсем алкогольлĕ шĕвекпе усă курса пуçĕсене минретме пуçларĕç. Кулянни, тарăхни çăмăлланать тата ытти сăлтавсем шыраççĕ ĕçес тесе”, – çапла шухăшланă паллă психиатр, академик В.Бехтерев (1857–1927). Çынна кунсерен сывлăш е апат питĕ кирлипе танлаштарсан, эрех питех те пĕчĕк пĕлтерĕшлĕ пулнине, алкогольлĕ шĕвексĕр те пурăнма май пуррине çирĕплетсе панă вăл.