12 мая 2010 г.
Мăкăнь, гашиш, героин, марихуана, ацетил хушнă опий, кантăр. Мĕнле япаласене асăнтăмăр-ши эпир. Тĕрĕс, наркотиксемпе наркотиклă ÿсентăрансене. Федерацин наркотиксен çаврăнăшĕпе кĕрешекен службин Чăваш енри управленийĕ вĕсемпе усă куракансене тата сутă тăвакансене тупса палăртассипе ĕçлет. Йĕркене пăснăшăн уголовнăй ĕçсем пуçараççĕ.
Наркотĕрĕслев служби яш-кĕрĕмпе хĕр-упраç ку енĕпе йăнăш çул çине ан тăччăр тесе тимлет. Çапах та закона пăсса çăмăл укçа туса илес илĕртмĕше парăннисем йышлăлансах пыраççĕ. Вĕсем хушшинче аслă çулсенчисем те пур.
Чăваш ене наркотике Хусантан, Чулхуларан, Санкт–Петербургран, Мускавран илсе килеççĕ. Ĕç вырăнне çухатнисем пысăк хуласене кайса çÿреççĕ, унта вĕсем тĕрлĕ меслет тупаççĕ. Темĕн чухлĕ чееленсен те наркотĕрĕслев ĕçченĕсем вĕсен çулне пÿлеççĕ. Иртнĕ çул эмел шур курăка (шалфей), гавай кĕл чечекне, сенкер лотоса наркотикла ÿсен-тăрансен шутне кĕртнĕ, вĕсене сутма чарнă.
Наркотикла япаласемпе усă курса хăвăр сывлăхăра ан сиенлĕр. Пĕрре тутанса пăхсан, эсир çав начар йăларан хăпаймастăр. Енчен те наркотик е ÿсен-тăранне илме сĕнекенсене куратăр пулсан, шалти ĕçсен районти пайне пĕлтерĕр.