23 апреля 2010 г.
Аслă Çĕнтерÿ тунăранпа 65 çул çитнине пур çĕрте те лайăх кĕтсе илме хатĕрленеççĕ. “Тăвайри кооператив” потребобщество коллективĕ вăрçăра пуçне хунă салтак-кооператорсене яланах асра тытать. Вĕсен ячĕсене çырнă плита кантурти стена çинчех çакăнса тăрать.
Пурăнакан вăрçă ветеранĕсене вара кашни çулах Çĕнтерÿ кунĕ ячĕпе саламлаççĕ, парне параççĕ.
Универмаг заведующийĕнче нумай çул ĕçленĕ Александр Михайлович Михайлова (Кушкă) кăçал Чăвашпотребсоюз йĕркелекен уява илсе кайма пăхса хăварнă. Поварта тăрăшнă Анфиса Степановна Степанова (Çăлпуç), сутуçă пулнă Константин Михайлович Михайлов (Çĕнĕ Пуянкасси), шут ĕçченĕнче вăй хунă Василий Александрович Александров (Ураскасси) та тимлĕхсĕр юлмĕç. Районти кооператорсем хăйсен аслă ĕçтешĕсене, мирлĕ пурнăçшăн тав туса, яланхи пекех парнепе хавхалантарĕç.