20 апреля 2010 г.
Вĕрентÿ ĕçченĕсен профсоюз райкомĕ те ачасем каникулта пулнă вăхăтра шкулсенче ĕçлекенсем хушшинче çуллен волейбол турнирĕ йĕркелет.
Хĕрарăмсем хушшинчи ăмăртусене кăçал 9 команда хутшăнчĕ. Икĕ ушкăна пайланса вылянă хыççăн ушкăнсенчен нăрвашсемпе пуянкассисем тата тушкилсемпе тăрмăшсем мала тухрĕç. Финалта нăрвашсемпе пуянкассисем, 3-мĕш вырăншăн тушкилсемпе тăрмăшсем вылярĕç. Пуянкассисем нăрвашсене 2:1,
тушкилсем тăрмăшсене 2:0 шутсемпе парăнтарчĕç.
Иртнĕ çул 3-мĕш вырăн йышăннă пуянкассисем кăçал çĕнтерÿçĕ пулса тăчĕç.
Арçынсем хĕрарăмсем пек тулли командăсемпе выляймарĕç (пĕтерет арçын вĕрентекен сахалли), çавна пула “пляж” волейболĕ выляма тиврĕ. Ку вара вăй-хала чылай пĕтерет (чупса ĕлкĕр-ха площадкипе виççĕнтен!). Вылякансен йышĕ те пĕртте улшăнман. ДЮСШн – В.Захаров, Н.Давыдов, В.Кузнецов, Пуянкасси шкулĕн – С.Кириллов, О.Гурьев, П.Романов. Финалта, иртнĕ çулхи пекех, ДЮСШ тата Çĕнĕ Пуянкасси шкулĕн командисем тĕл пулчĕç. Пĕрремĕш партие тренерсем выляса илчĕç, иккĕмĕшпе виççĕмĕшĕнче ăнăçу шкул команди енче пулчĕ. Тушкилсем иртнĕ çулхи çухатушăн йăнтăрчăсенчен 2:0 шутпа реванш илчĕç, 3-мĕш вырăна тухрĕç. Çапла вара Çĕнĕ Пуянкасси шкулĕнче ĕçлекен хĕрарăмсемпе арçынсем дубль турĕç, икĕ кубок çĕнсе илчĕç. Мала тухнă командăсене дипломсемпе парнесем парса хавхалантарнă.