30 марта 2010 г.
Шăматкунпа вырсарникун Тăвайри шашка-шахмат клубĕнче район кубокĕшĕн ăмăртусем пулчĕç. Шахматистсем шăпа янă хыççăн 45-шер минутран тăракан 2 парти вылярĕç. Çурма финала А.Шишов, В.Дмитриев, В.Пастухов тата А.Афанасьев çитрĕç. А.Афанасьев тан пынă кĕрешÿре опытлă Ю.Арестовран хушма тĕл пулура выляса илчĕ. В.Дмитриевпа И.Данилов хушшинче те кам вăйлăраххине хушма тĕл пулусенче татса памалла пулчĕ. Пуринчен те лайăхрах формăра вара иртнĕ çул спорт мастерĕн кандидачĕн нормине пурнăçланă В.Пастухов пулчĕ. Вăл вăйăсен кашни тапхăрнех тарăн шухăшласа, пуçтарăнса вылярĕ, пурне те “типĕлле” çĕнтерсе пычĕ. Финалта В.Дмитриева та çăмăллăнах парăнтарчĕ.
Çапла вара В.Пастухов çак уйăхра 2 кубок çĕнсе илчĕ: район пуçлăхăнне тата районăнне. Халĕ район чемпионĕ Г.Федотовпа ун хушшинче суперкубокшăн микроматч пырать.