12 марта 2010 г.
Тăвай районĕнчи футболистсем Атăл çи федераллă округра Чăваш Республикин чысне хÿтĕлени ку таранччен пулманччĕ-ха. Февралĕн 24–27-мĕшĕсенче вара Тăвайри вăтам шкул футболисчĕсем (1993–1994 çулсенче çуралнисем) 11 команда шутĕнче асăннă округри ăмăртусен финалти пайне хутшăнма тивĕçрĕç. Вăл Йошкар-Олара иртнĕ. Унта Чулхула, Оренбург, Пенза, Самар облаçĕсен, Удмурт, Чăваш, Мари Республикисен çамрăк футболисчĕсем вылянă. Тăвайсем Мари Эл футболисчĕсемпе 4:4 шутпа вылянă пулсан, Чулхула облаçĕн командине 5:1 шутпа çĕнтернĕ, ăмăртусенче 7-мĕш вырăн йышăннă.
Тăвай ачисем футболла кĕçĕн классенчех выляса ÿснĕ. Вĕсен пĕрремĕш тренерĕ Иван Григорьевич Степанов пулнă. Тренер ĕçлеме пăрахсан та, ачасем юратнă вăййа хăварман, ăсталăха хăйсем тĕллĕн ÿстерсе пынă. Çакă вĕсене çитĕнÿ тума май панă.