20 ноября 2009 г.
Лайăх çын пирки çырма та кăмăллă. Сăмах кунта Йăнтăрчă ялĕнче пурăнакан Галина Павловна Яковлева пирки пырать-ха. Вăл çитес эрнере 55 çул тултарса тивĕçлĕ канăва тухать. Йăнтăрчăна Вăрманхĕрри ялĕнчен качча килнĕ вăл. Мăшăрĕпе, Петр Сергеевич Яковлевпа, иккĕшĕ те ял хуçалăх институтĕнче пĕлÿ илнĕ, ял хуçалăх специалисчĕсем пулса тăнă. Иккĕшĕ те хăй вăхăтĕнче районти сысна самăртмалли комплексра ĕçленĕ. Ун хыççăн Галина Павловна ялти “Луч” хуçалăхра секретарь-машинисткăра ĕçлеме тытăнчĕ. Унтан кадрсен пайне ертсе пычĕ. Халĕ Петр Сергеевичпа иккĕшĕ те килте тăрмашаççĕ: икĕ-виçĕ пуç мăйракаллă шултра выльăх, лаша, ытти выльăхпа кайăк-кĕшĕк усраççĕ, нумайранпа хурт-хăмăр ĕрчетеççĕ, пурнăçа ăнтарса пыраççĕ. Ачисем те – хĕрпе ывăл – ÿссе çитĕннĕ. Хĕрĕ, Татьяна, хăйсем пекех, ял хуçалăх академийĕ пĕтернĕ. Качча тухса, çемьеленнĕ, ача ÿсет унăн.
Галина Павловнана вара малашне те çирĕп сывлăх, вăрăм кун-çул, телейпе ăнăçусем сунас килет.