30 октября 2009 г.
“Акконд–агро фирма” обществăри дояркăсен сăвăмĕ районта чи пысăкки. Кунта 4 доярка (е, тĕрĕсрех каласан, машинăпа ĕне сăвакан оператор) ĕçлет: Полина Васильевна Семина, Антонина Дмитриевна Антонова, Зоя Николаевна Морозова тата Ольга Николаевна Арапова. Вĕсенчен кашниех кăçалхи 9 уйăхра пĕр ĕне пуçне 4506-шар килограмм сĕт суса илнĕ. Хальхи вăхăтра асăннă ĕçченсем çулталăк вĕçлениччен ĕнесен продуктивлăхне 5 пин килограмран ирттерес ĕмĕт-тĕллевпе тăрăшса ĕçлеççĕ. Комплексра Белоруссирен илсе килнĕ ĕнесем иккĕмĕш хут пăрулама пуçланă. Выльăхсене валли тĕрлĕ апат çителĕклĕ хатĕрлесе хунă, çак ĕçре малта пыракан технологие тĕпе хунă.
Халĕ кунти ĕнесем талăкра кашни вăтамран 10,8 килограмм сĕт параççĕ.
Источник: "Ял ĕçченĕ"