19 мая 2009 г.
Президент стипендиачĕ (Общество)
Тăвайри Макаровсен кĕçĕн хĕрĕ Алена та кĕçех алла диплом илĕ. Вăл “хĕрлĕ” пуласси пирки иккĕленмелли çук. Мĕншĕн тесен кашни курсах лайăх паллăсемпе вĕçлесе пынă. Çак кунсенче, акă, патшалăх экзаменне “пиллĕкпе” тытрĕ. Хальхи вăхăтра вара хĕрсе кайсах диплом ĕçне хÿтĕлеме хатĕрленет.
Алена Чăваш ял хуçалăх академийĕнчен экономиста вĕренсе тухать. 2007 çулта вăл Россельхозбанкăн ятарлă стипендине тивĕçнĕччĕ. Кăçал вĕренÿри тата обществăлла ĕçри çитĕнÿсемшĕн маттур пике Чăваш Президенчĕн стипендиачĕ пулса тăчĕ.
Аппăшĕсем, Оксанăпа Олеся, университет пĕтерсе пурнăçра хăйсен вырăнне тупнă ĕнтĕ. Иккĕшĕ те шкула медальсемпе, аслă шкулсене хĕрлĕ дипломсемпе пĕтернĕ. Кĕçĕн хĕрĕн çитĕнĕвĕсем те ашшĕпе амăшĕшĕн пысăк савăнăç. Вĕсем хăйсем те çак институтрах аслă пĕлÿ илнĕ. Вăтаяль каччипе Етĕрне хĕрĕ кунта пĕр-пĕрне тĕл пулнă, юратса çемье çавăрнă. Иккĕшĕ те студент вăхăтĕнче активистсен шутĕнче пулнă. Ăмăртусенче институт чысне хÿтĕленĕ, смотр-конкурссенче хитре сассисемпе тыткăнланă. Халĕ Сергей Павлович “Акконд-агро фирма” обществăра инженер-механикре, Галина Феофановна “Росельхозцентрăн” Тăвайри филиалĕнче агрономра тăрăшаççĕ.
Юрă-ташă пултарулăхĕпе Алена та ашшĕ-амăшĕнчен кая мар. Институтри ташă ушкăнĕпе миçе концерта хутшăнман-ши; Ялсенчи çамрăксемпе те, ĕçпе вăрçă ветеранĕсемпе те тĕл пулнă. Ашшĕ пекех спортпа туслă. “Аленăна Президент стипендиачĕ пулнă ятпа саламлатпăр, малашлăхра ăнăçусем сунатпăр”,– теççĕ тантăшĕсем савăнăçа унпа пĕрле пайласа.
Р.ШУМОВА.
Источник: "Ял ĕçченĕ"