29 мая 2009 г.
Паркаланать уй-хир (Сельское хозяйство)
Çут çанталăкăн асамлă вăйхăвачĕпе, çурхи нÿрĕкпе тата çĕр ĕçченĕсен тарĕпе шăтса паркаланать уй-хир. Çурхи вăхăт хакне тарăннăн ăнланса вăй хунă çуракинче “Победа” ОООри çĕр ĕçлекенсем те. Хĕрÿ ĕçсем пуçланиччен техникăна тĕплĕ юсаса хатĕрлеме тăрăшнă. Çакă вара, хире тухсан, кал-кал ĕçлеме май панă. Çĕр ĕçĕсем малтанах кĕркунне сухаласа хăварнă уйсенче пуçланнă, вĕсене сÿрелесе нÿрĕк хупланă, ун хыççăн культиваци туса çĕр хатĕрленĕ, акнă. Андрей Кучеров икĕ культиватора пĕрлештернĕ агрегатпа çĕр кăпкалатса хатĕрленĕ. Çĕнĕ Т–150 тракторпа тухнă вăл хире. Владимир Жилкин тепĕр Т–150 тракторпа культиваци тунă. Кайран вăлах БДТ–7 дисклă сÿрепе те ĕçленĕ.
Кĕркунне сухаласа хăварнă уйсене сĕлĕпе урпа тата çурхи тулă вырнаçтарнă. Акаканĕсем – Виталий Васильевпа Олег Ефимов. Вĕсем пĕрер сеялкăллă агрегатсемпе тăрăшнă, вăрлăха кăпăшка çĕре тикĕс варăнтарса пыма тимленĕ. Çак ĕçре вĕсене Владимир Николаевпа Сергей Кузнецов сеяльщиксем пулăшнă. Вăрлăхсене пилĕк хĕрарăм – Рая Карпова завсклад, Оля Жилкина, Елена Петрова, Елена Потапова тата Галина Якимова имçамласа, михĕсене тултарса тата тиесе ăсатса тăнă. Ака агрегачĕсене вăрлăхпа Павел Тимофеевпа Анатолий Хумышев водительсем тивĕçтернĕ. П.Тимофеев вăрлăха сеялкăсем çине пушатма та кал-кал пулăшнă. Александр Гладков техникăна юсаса хатĕрлес, агрегатсене уя йĕркелесе кăларас ĕçсенче тимленĕ.
Сеялкăсем катоксемпе пулнă, çĕре акнă хыççăн тикĕслесех пынă. Калчасем лайăх паркаланаççĕ халь – çакă савăнтарать çĕр ĕçлекенсене. Вĕсене çу каçа тимлĕхре тытĕç.
В.ИВАНОВ.
Источник: "Ял ĕçченĕ"