23 июня 2009 г.
Асăну митингĕнче (Общество)
1941 çулхи июнĕн 22-мĕшĕнче, 68 çул каялла, Тăван çĕршывăн Аслă вăрçи пуçланнă. Асăнупа хурлăх кунĕнче эпир мирлĕ пурнăçшăн çапăçса пуçне хунисене аса илетпĕр.
Пирĕн районтан вăрçа 5429 çын тухса кайнă, вĕсенчен 179-шĕ хĕрарăм, 3156-шĕ каялла таврăнайман.
...Ĕнер Тăвайри Мухтав монуменчĕ умĕнче асăну митингĕ пулса иртнĕ. “Эпир хамăра мирлĕ пурнăç туса панă паттăрсене яланах асра тытатпăр”, – терĕ район пуçлăхĕ Н.Иванов монумент умне чечек çыххи хурса.
Л.Иванова вăрçă ветеранĕпе районти вăрçăпа ĕç ветеранĕсен председателĕ Р.Гурина сăмах тухса каларĕç. “Хăрушă вăрçă çĕр çинче урăх ан пултăр”, – терĕç. Тăвайри вăтам шкулта вĕренекенсем сăвăсем вуларĕç. Пухăннисем пуçĕсене хунă салтаксене асăнса пĕр минут шăп тăчĕç.
В.ЧАЙКИН.
Источник: "Ял ĕçченĕ"