19 июня 2009 г.
Кăнтăрла та, каçхине те çулаççĕ (Сельское хозяйство)
Тăрмăшри Ленин ячĕллĕ ял хуçалăх кооперативĕнче утă вăхăчĕ пуçланнă. Вăл выльăх-чĕрлĕхе ăнăçлă хĕл каçарма тĕрлĕ выльăх апачĕ ытлă-çитлĕ хатĕрлесе хурас тĕллевпе пулса пырать. Чăн та, хальлĕхе утă пухса кĕртме тытăнайман-ха, анчах нумай çул ÿсекен курăксене 110 гектар çулса пăрахнă. Вĕсене Е-302 нимĕç комбайнĕпе Владимир Дмитриевпа Виктор Николаев çулнине каласа пачĕç. Пĕри кун çутинче çулать пулсан, тепри каçхине тухать нимĕç комбайнĕпе курăк пуссине. Ĕç ÿсĕнтĕр тесе çапла тăваççĕ.
Михаил Суракин механизатор курăксене тавăрса пуçтарса преслама хатĕрлет. Кооператив ертÿçи Виктор Владимирович каланă тăрăх, утта преслама Петр Николаевич Николаев тухать рулонлă преспа. Курăкĕ кирлĕ пек типсе çитейменрен юнкун пуçăнайманччĕ-ха ку ĕçе. Анчах ăна вăраха ямĕç, çак кунсенчех тытăнĕç.
Сенажа ытларах пĕр çул ÿсекен курăксенчен хывма палăртаççĕ. Çавăнпа ăна хатĕрлеме паян-ыранах мар,çитес эрнесенче пуçăнас шухăшлă. Пĕр çул ÿсекен курăксен тепĕртак ÿсмелле-ха, массине те, тутлăхлă япаласем те хушмалла.
Хуçалăхра кĕрхи тĕш тырă культурисемпе çуртрисем 1015 гектар йышăннине каларĕ председатель. Вĕсене çум курăксенчен химилле майпа хÿтĕленĕ, ирĕклĕ аталанса ÿсме условисем туса панă.
Çапла вара хуçалăхра утçи вăй илсе пырĕ.
В.ИВАНОВ.
Источник: "Ял ĕçченĕ"