13 мая 2009 г.
“Акконд–агро” акана вĕçлерĕ (Сельское хозяйство)
“Акконд–агро фирма” общество майăн 9-мĕшĕнче çурхи ака ĕçĕсене вĕçлерĕ. 1318 гектар çинче çуртрисемпе пăрçа йышши культурăсем, çав шутра 30 ытла гектарĕ выльăхсене çулса çитермелĕх акса хăварнă. Пур культурăна та удобрени парса акнă, кĕр калчисемпе нумай çул ÿсекен курăксене аммиак селитрипе хутăш удобрени парса апатлантарнă. Тĕрĕссипе, 1 гектар та удобренисĕр акăнман, пурĕ 3 ытла вагон удобрени расхутланă.
Çурхи уй-хир ĕçĕсене общество апрелĕн 27-мĕшĕнче калчасемпе курăксене апатлантарас, нÿрĕк хупласа хăварас, çĕр хатĕрлес ĕçсенчен пуçăнчĕ. Ку ĕçсене Г.Григорьев, А.Афанасьев, В.Данилов, В.Семенов, Ю.Яковлев механизаторсем хастар туса пычĕç. А.Птичкин, А.Козлов КамАЗсемпе, И.Сергеев, Н.Поликарпов, Н.Михайлов ЗИЛсемпе удобренипе тата вăрлăхпа татти-сыпписĕр тивĕçтерсе тăчĕç. И.Большов механизатор ятарлă агрегатпа удобрение машинăсене тиерĕ.
Михаил Егоров хăватлă “Case” комплекспа 760, Владимир Демин МТЗ-82 тракторпа 500 ытла гектар çурхи культурăсем акнă, вĕсене районти ĕçпе тивĕçтерекен центртан янă Михаил Волковпа Александр Васильев сеяльщиксем пулăшса тăчĕç. Ю.Яковлев механизатор начар хĕл каçнă калча лаптăкĕсене çĕнĕрен хушса акрĕ.
Ĕçе конвейер системипе йĕркелени, йывăр ĕçсене техникăпа механизмсем пулăшнипе пурнăçлани çуракине кĕске вăхăтра тата лайăх пахалăхпа ирттерме май пачĕ. Общество тепĕр 200 гектар çинче кукуруза акĕ.
Н.МИХАЙЛОВ, тĕп агроном.
Источник: "Ял ĕçченĕ"