27 марта 2009 г.
Çурхи çулсем ултавлă (Правопорядок)
Çуркунне çулсем пăрлакланаççĕ. Кăнтăрла ăшă, çĕрле шăнтать. Çул хĕррисем юрпа пăртан тасалса пылчăкланаççĕ. Çĕрсем тĕттĕм. Çавăнпа водительсен те, çурран çÿрекенсен те ку вăхăтра уйрăмах тимлĕ пулмалла. Район центрĕнчи Ленин урамĕпе Ленин проспектĕнче вара тротуарсем пур çинчех хăш-пĕрисем автотранспорт çÿрекен çулпа утаççĕ. Çавăн пек тĕслĕхсем Улянкă ялĕнчи Ленин урамĕпе Тăвайран Вăрманхĕрри ялнелле каякан çул çинче те тăтăш тĕл пулаççĕ. Çул варрипе утни автотранспорт хатĕрĕсемшĕн те, çурран çыншăн хăйĕншĕн те хăрушлăх кăларса тăратать, çавна май кирек хăш вăхăтра авари пулмалли лару-тăру сиксе тухма пултарать. Енчен те руль умĕнче ÿсĕр водитель; Е хăвăртлăха юратакан çăмăлттай; Ун пек чух инкек хăрушлăхĕ татах ÿсет. Тимсĕрлĕхе, çул çÿремелли йĕркесене пăснине пула районти çулсем çинче çын пурнăçĕ татăлнă тĕслĕхсем темиçе те пулнă. Анчах çынсем çавсенчен тивĕçлĕ пĕтĕмлетÿсем тума васкамаççĕ. Çурран çÿрекенсене тротуарпа, вăл çук çĕрте çул айккипе çул-йĕр йĕркисене пăхăнса çÿреме ыйтасшăн.
Водительсене те асăрхаттарас килет. Автотранспорт хатĕрĕпе çула тухни – сирĕншĕн пысăк яваплăх. Асфальт çине çул айккинчи пылчăка илсе тухмалла мар. Нумай чухне пылчăк çул-йĕр инкекĕн сăлтавĕ пулса тăрать. Çула вараланăшăн водительсене КоАПăн 12.33 статйипе килĕшÿллĕн явап тыттараççĕ, 1500 тенкĕ таран штраф тÿлеттерме пултараççĕ.
Çул-йĕр çинчи тимлĕх, асăрханулăх ку таранччен никамшăн та ытлашши пулман. Ваттисем ахальтен каламан пулĕ сыхланакана турă хăй сыхлать, тесе. Çула тухсан пурте тимлĕ пулар.
А.ГЕРАСИМОВ, ГИБДДн районти уйрăмĕн пропаганда енĕпе ĕçлекен инспекторĕ.
Источник: "Ял ĕçченĕ"