24 марта 2009 г.
Пирĕн Алиса – “Студентсен хулин мисĕ” (Общество)
Пуш уйăхĕн пуçламăшĕнче И.Н.Ульянов ячĕллĕ Чăваш патшалăх университечĕ çумĕнчи “Студентсен хулинчи” 7 общежитире кăçал пĕрремĕш хут “Мисс Студгородка” ятлă конкурс иртрĕ. Пирĕн ентеш Алиса Королева çĕнтерÿçĕ пулса тăни çинчен хаваспа пĕлтерес килет. Тăвай шкулне пĕлтĕр ылтăн медальпе пĕтернĕскер, Алиса журналистика факультетне вĕренме кĕчĕ. Тÿрех ăна ушкăн старостине суйларĕç. Вăл пур мероприятие те активлă хутшăнать, “5” паллăпа кăна вĕренет.
Çав вăхăтрах “МТV” тата “Вести Чебоксары” телеканалсенче журналистра ĕçлеме те вăхăт тупать.
Хамăр районтан эпир виçĕ юлташ – Алиса Королева (Тăвай), Марина Максимова (Тенеяль) тата эпĕ (Тĕмер) редколлегинче тăрăшатпăр. Виçсĕмĕре те студентсен совечĕн членне суйланă.
Алисăна хавхалантарма нумайăн пухăнтăмăр. Шкулта пĕрле вĕреннĕ юлташĕсем, общежити каччисем маттур хĕрĕшĕн плакатсем тытсах кăшкăрчĕç. Куракансене вăл илемĕпе, ятуллă çи-пуçĕпе, ăс-тăнĕпе, çепĕç сассипе тыткăнларĕ. “А у моей любви” юрă шăрантарчĕ. 12 пике хушшинче жюри А.Королевана çĕнтерÿçĕ тесе йышăнчĕ, корона тăхăнтарчĕç. Питĕ савăнтăмăр хамăр ентешшĕн. Малашне те ĕçÿ-хĕлÿ ăнăçса пытăр санăн, Алиса.
Галина ФЕДОРОВА, Чăваш патшалăх университечĕн студентки.
Источник: "Ял ĕçченĕ"