13 марта 2009 г.
Çамрăк спортсменсем пысăк йывăрлăхра (Спорт)
Шупашкарта Ухсай ячĕллĕ керменте самбо кĕрешĕвĕпе республикăри ăмăртусем пулчĕç. Республикăри тĕрлĕ районсемпе хуласенчен пухăнчĕç унта çамрăк спортсменсем. Тăрмăш шкулĕнчен С.Семенов (7 кл.), Е.Суракин, В.Звонарев, М.Иванов, Д.Васильев (пурте тăххăрмĕшсем), Е.Алексеевпа М.Иванов (10 кл.) вĕренекенсем те хутшăнчĕç унта. 15–16 çулхи самбистсем питĕ пĕлсе кĕрешеççĕ, хăш-пĕрисем çичшер çул спорт залне çÿреççĕ. Çав ăста самбистсем хушшинче те пирĕн çамрăксем çухалса каймарĕç, хăйсем çине тăрса кĕрешме пултарнине кăтартса пачĕç. Акă Виктор Звонарев хăй виçинче 3-мĕш вырăна тухрĕ. Вăл йĕлтĕрпе те чупать, районта вăйлисенчен пĕри. Ăна сцена пултарулăхĕнче те куратăн. Вĕренÿре те чиперех ĕлкĕрсе пырать.
Пирĕн шкулти çамрăксем спортăн çак енне аталантарас ĕçре пысăк йывăрлăх тÿсни çинчен эпĕ хаçатра пĕрре çеç мар çырнă. Ачасем матсем сарса кĕрешеççĕ, вĕсем вара çĕтĕлсе пĕтнĕ, кĕрешме те хăрушă. Пире питĕ кавир кирлĕ. Анчах пирĕн нушана никам та ăнланасшăн мар, эрне эпир район чысне хÿтĕлетпĕр. Нивушлĕ пус çумне пус хушса, спонсорла пулăшупа усă курса районшăн кĕрешÿ кавирĕ туянма çук; Кĕрешес кăмăллă ачасем сахал мар шкулта. Секци хупăнсан, çамрăксенчен чылайăшĕ, спортран сивĕнсе, урам тăрăх йытă хăваласа çÿреме пуçлать. Яваплă вырăнсенче ĕçлекенсен çавăн пирки те шухăшласа пăхасчĕ.
М.АНДРЕЕВ, Тăрмăшри вăтам шкулти самбо секцийĕн ертÿçи.
Источник: "Ял ĕçченĕ"