06 марта 2009 г.
Çамрăксем анлăрах професси илесшĕн (Занятость)
Халăха ĕçпе тивĕçтерекен районти центр ĕçсĕр çынсене, çамрăксене тĕрлĕ профессие вĕрентсе ĕçе вырнаçтарма пулăшать. Сăмахран, иртнĕ çул центр урлă 14 тракторист (С тата Е категорисем) вĕрентсе кăларнă.
–Кăçалхи февраль çурринчен каллех трактористсен курсне йĕркелерĕмĕр. Кирлĕ професси. 15 çын кăмăл турĕ ăна алла илме. Ытларахăшĕ çар служби хыççăн ĕç шыракан хастар, мал ĕмĕтлĕ çамрăксем, – каласа парать центрăн тĕп специалисчĕ О.Владимирова.
Курса ертсе пыракан П.Гурин специалистран ыйтса пĕлнĕ тăрăх, Йăнтăрчă ялĕнчен 3 каччă вĕренет. Владимир Александров, Андрей Николаев, Петр Яковлев виççĕшĕ те çар служби хыççăн. Николаевсен кил хуçалăхĕнче хăйсен те кустăрмаллă трактор пур, анчах Андрейăн тракторист прави çук.
Салари Сергей Тихонов ашшĕпе комбайнер помощникĕнче те, трактористра та, водительре те ĕçленĕ. Ăна та документ кирлĕ, вăл анлăрах профессиллĕ пуласшăн. Унăн юлташĕ Денис Новиков 18 çулта кăна. Вĕсен çемйи Санкт–Петербургран куçса килнĕ.
Амалăхри Валерий Владык механизатор çемйинчен. Çамрăк комбайнпа та ĕçленĕ. Çак ялтанах А.Ивановпа Е.Перлов çамрăксем çÿреççĕ курса.
Чÿкçырминчи Ю.Вастуловпа В.Ильин çулĕсемпе çамрăках мар, вĕсен тĕрлĕ специальноçсем пур, çавах та вĕсем категорисене ÿстересшĕн.
Занятисем эрнере 5 кун пулаççĕ, пурĕ 3,5 уйăх вĕренмелле. 2 уйăха практикăна яраççĕ. Вĕренекенсене центр стипенди, çул укçи тÿлет, укçа-тенкĕ парса пулăшать.
О.АЛЕКСЕЕВА.
Источник: "Ял ĕçченĕ"