13 января 2009 г.
“Çамрăклăх” хаваслăх кÿрет (Культура)
Канаш хулинчи культура керменĕ çумĕнче “Çамрăклăх” халăх театрĕ ĕçлет. Ăна Алевтина Яшманова режиссер хавхалантарса пырать.
Спектакль лартма вĕсем 2002 çултах пуçăннă. Ун чухне пултарулăх ушкăнĕ кăна пулнă. Тĕрлĕ çулсенчи, тĕрлĕ профессиллĕ çынсем çÿренĕ репетицисене. Малтан Е.Никитинăн “Хĕвел ансан Хĕветĕр” пьесине лартнă вĕсем. Каярахпа Тăвай районĕнче çуралса ÿснĕ паллă драматургăн Н.Сидоровăн “Хусах Ваççа авланать” камитне сцена çине кăларнă. “Н.Угарин драматургăн “Улька кинĕн виçĕ кинĕ” спектакль хыççăн пирĕн ят-сум татах ÿсрĕ”,– тет Алевтина Михайловна.
Тĕрлĕ конкурссене, пултарулăх смотрĕсене хутшăнса халăх театрĕн ятне тивĕç пулнă канашсем.
Çакăн хыççăн вĕсем кÿршĕ районти “Ял ĕçченĕ” хаçатра нумайранпа ĕçлекен А.Никитина журналист халăх театрĕсем валли пысăках мар пьесăсем çырнине пĕлнĕ. “Вĕрентеççĕ арăмсем” камитне ярса панă вĕсене Альбина Александровна. “Асăннă спектакле курнă хыççăн эрне хушши кулса çÿрерĕм. Ăсран тайăлма пуçламарăн пулĕ те тесе тĕлĕнетчĕ арăм. Артистсем питĕ лайăх вылярĕç те ролĕсене, халĕ те кулма чарăнаймастăп-ха, çапла каласа кăтартнăччĕ пĕррехинче кÿршĕ ялти пĕлĕшĕм. Çак сăмахсем маншăн та, артистсемшĕн те сахăр катăкĕ пекех туйăнчĕç. Эппин эпир ĕçлени харама каймасть, тесе шухăшларăмăр”,– калаçăвне тăсрĕ А.Яшманова режиссер.
Пĕлтĕр “Çамрăклăх” театр А.Никитинан “Виççĕн- виçĕ еннелле” пьесине хатĕрленĕ. Канаш районĕнчи хăшпĕр ялсенче, Çĕрпÿ хулинче пурăнакансем пăхса киленчĕç ăна. Иртнĕ уйăхра Канашри культура керменне халăх йышлă пухăнчĕ çамрăксен пултарулăхĕпе паллашма. Çÿллĕ шайра вылярĕç артистсем шанса панă рольсене. А.Яшманова режиссер кашнинпе паллаштарчĕ кайран, чечек çыххисем пачĕ. Ăшă сăмаха çавăн пекех сасă операторĕ, çутăсемпе илемлетекен, художник, культура керменĕн директорĕпе илемлĕх ертÿçи тивĕçлĕ пулчĕç. Куракансем артистсене чылайччен алă çупса тав турĕç.
Канаш хулинчи “Çамрăклăх” халăх театрĕ хăйĕн пултарулăхĕпе кÿршĕ районсенче пурăнакансене татах савăнтарма ĕмĕтленет.
В.АЧЧА.
Источник: "Ял ĕçченĕ"