20 февраля 2009 г.
Туслăх кубокĕ (Спорт)
Хоккей сезонĕ хĕрсех пырать. Çавах та пирĕн район пирки çакна çирĕплетсе калама çук. Çак интереслĕ вăйă Чÿкçырминче кăна йăл илнĕ. Ытти районсенче вара, калăпăр, Елчĕкре, Патăрьелĕнче юлашки çулсенче хоккей вăййине аталантарма тăрăшаççĕ. Елчĕк районĕнче 4–5 ял çамрăкĕсем хоккейла выляççĕ, вĕсен – 3–4 коробка. Пирĕн вара никампа выляса ăсталăха ÿстерме çук. Мĕншĕн çакна районтисем шута илмеççĕ-ши; “Ылтăн шайба” клуб парнишĕн пыракан ăмăртусене чылай çул каялла пирĕн районти тĕрлĕ шкулсен çамрăк хоккеисчĕсем те хастар хутшăннине калаççĕ. Халĕ район чысне республика шайĕнче те чÿкçырмисемпе вăрманхĕррисем кăна хÿтĕлеççĕ. Çак çитменлĕх пирки хаçатра иртнĕ çул та сăмах хускатнăччĕ, анчах вăл яваплă çынсем çине витĕм кÿреймерĕ пулас.
Çапла, чÿкçырмисем, маттур, тесшĕн эпĕ. Тĕп ушкăнри команда финала тухма тивĕçрĕ. Вĕсемпе елчĕксем хушшинчи вăйă çав тери çивĕч иртрĕ, чÿкçырмисем 4:3 шутпа çĕнтерчĕç. Район чысне ку ÿсĕмре Сергей Степанов, Николай Конов, Алексей Львов, Иван Чернов, Сашăпа Дима Леонтьевсем, Миша Сальниковпа Артем Андреев хÿтĕлеççĕ. Вăтам ушкăнра та çивĕч пычĕ кĕрешÿ, анчах 4:5 шутпа елчĕксене выляса ячĕç.
Çитĕннисем вара нумаях пулмасть первомайскисене (Патăрьел районĕ) йышăнчĕç. Туслăх кубокне 11:6 шутпа чÿкçырмисем выляса илчĕç. Саша Никитин, М.Алексеев ветеран, С.Степанов вĕренекен, А.Дмитриев вратарь ăсталăхпа палăрчĕç.
В.ИВАНОВ, обществăлла тренер.
Источник: "Ял ĕçченĕ"