20 февраля 2009 г.
Афганецсемпе тĕл пулу (Образование)
Оборонăпа массăллă тата спорт уйăхлăхне Енĕш Нăрваш шкулĕнче вĕренекенсем те хастар хутшăнаççĕ. Йĕлтĕрпе чупассипе, пăшалтан перессипе ăмăртусем, халăх вăййисен спартакиади пулса иртрĕç. Çанталăк ăшă тăнипе усă курса ачасем йĕлтĕрсем çине тăрса хĕллехи вăрмана çитсе килчĕç.
Совет Союзĕ Афганистанран хамăр çарсене илсе тухнăранпа 20 çул çитнĕ май шкула унти çапăçусене хутшăннă ентешсене чĕнтĕмĕр. Тĕл пулăва Александр Федоров, Олег Кузьмин тата Чечен вăрçинче пулнă Сергей Григорьев пычĕç. Вĕсем ачасене çав çулсенчи синкерлĕ вăрçă çинчен каласа кăтартрĕç, спортпа туслă пулма сĕнчĕç. Шкул дирекцийĕ вĕсене çамрăксене патриотла воспитани парас ĕçе хутшăннăшăн тав туса грамотăсемпе чысларĕ.
Нăрваш шкулĕ “Раççей йĕлтĕр йĕрĕ-2009” районти ăмăртусене хастар хутшăнчĕ. Иван Николаев вĕренекен малтисен ретне кĕрсе торт тата спорт калпакĕ илме тивĕçрĕ.
Л.СТЕПАНОВА.
Источник: "Ял ĕçченĕ"