20 февраля 2009 г.
Присяга тытнă çĕрте пултăмăр (Общество)
Аслă ывăл Миша патне, çулĕ инçе пирки, присяга тытнă çĕре каяймарăмăр. Мĕншĕн тесен вăл Инçет Хĕвелтухăçне службăна лекнĕччĕ. Кĕçĕнни хĕсмете Мурома лексен çемйипех савăнтăмăр. Январĕн 31-мĕшĕнче присяга пуласси çинчен çырса пĕлтерчĕ вăл.
Миша ывăлăмпа иксĕмĕр çула тухрăмăр, пире ăшшăн кĕтсе илчĕç. Присягăна урамра тытрĕç. Чăн-чăн салтаксем пек хăйсем, автоматсемпе, çĕнĕ тумсемпе. Казармăна кĕрсе куртăмăр. Таса, типтерлĕ, чей ĕçмелли пÿлĕм те пур. Буфет та ĕçлет. Эпир пынипе çеç тутлă апат çитереççĕ пулĕ тенĕччĕ. “Вĕри апатсăр пуçне кашни кунах салат, бутерброд параççĕ”,– терĕç салтаксем. “Килти пекех тутлă пĕçерме тăрăшатпăр, пирĕн ачасем те службăра, вĕсене те çакăн пекех çитерччĕр тетпĕр”,– сăмах хушрĕç поварĕсем. Мунчи те çĕнĕ, хăтлă.
Чаçĕ пысăках мар. “Дедовщина” текенни çук, терĕç. Часах Алешăсене пĕр уйăхлăха Рязане вĕренме илсе каяссине пĕлтĕмĕр, унтан каялла Муромах таврăнаççĕ.
Май уйăхĕнче чаç 35 çул тултарнине паллă тума пире те хăнана чĕнчĕç. Каяс кăмăл пур-ха. “Çулталăк часах иртĕ, тепĕр вунă уйăх анчах юлчĕ, хăнăхса çитетпĕр те уйрăмалла пулĕ”,– теççĕ хăйсем.
“Çамрăксен салтака кайма хăрамалла мар. Çар ретне тăриччен организма пиçĕхтермелле. Кунта вара спортпа туслă пулни питĕ кирлĕ. Кашни занятирех кунта сикесси, туртăнасси, кĕлеткене çĕклесси, чупасси. Режима хăнăхни те пулăшать пулас салтака”,– терĕ Алеша.
Çапла, салтак пăтти çиессинчен хăраса тăмалла мар. Пире те сыхлакан, хÿтĕлекен çынсем кирлĕ.
Е.МАТРОСОВА, салтак амăшĕ. Тăрмăш ялĕ.