13 февраля 2009 г.
Тăвайпа Тăрмăшра волейбол уявĕ (Спорт)
Районăн ăста спортсменне, пултаруллă наставникне асăнса ирттерекен çулленхи волейбол турнирне кăçал 8 команда хутшăнчĕ. Тăвайри спорткомплексра районти ветерансен “Дорстрой” (Тăвай), “Дорстрой” (Шупашкар), Тушкилĕн 2-мĕш тата Вăрнар районĕн командисем вылярĕç. Пирвай площадкăра Тăвайпа Канаш ветеранĕсем тĕл пулчĕç. Канашсем 2:0 шутпа çĕнтерчĕç.Тăрмăшра вара зал хуçисем Канаш хулин ветерансемпе вăйлатнă, Тушкилĕн 1-мĕш, Шупашкарти “Старко” командисене йышăнчĕç. Ушкăнсенче мала тухнă командăсем пĕр-пĕринпе тĕл пулчĕç: Тăрмăшра 1-мĕш вырăн йышăннă тушкилсем (капитанĕ А.Шарапов) Тăвайра 2-мĕш вырăна тухнă вăрнарсемпе, “Дорстрой” (Шупашкар) “Старкопа”. Вăрнарсем лайăх выляççĕ. Вĕсем Тăвайри “Дорстрой” тата Тушкилĕн 2-мĕш командисенчен çăмăллăнах 2:0 шутпа выляса илчĕç, анчах шупашкарсенчен çухату тÿсрĕç (чăн та, 2-мĕш партире 21:25 шутпа кăна). Финалта вĕсен, Тушкилĕн 1-мĕш командине вăйлă хирĕç тăчĕç пулин те, 1:2 шутпа парăнма тиврĕ. Çавах та вăрнарсем “Старкоран” 2:0 шутпа выляса илсе 3-мĕш вырăн йышăнма пултарчĕç.
“Дорстрой” (Шупашкар) “Старкона” çăмăллăнах 2:0 шутпа парăнтарчĕ. Çапла вара финалта Тушкилĕн “легионерсемпе” çирĕплетнĕ команди “Дорстройпа” (Шупашкар) тĕл пулчĕ. Тушкилсем пĕрремĕш партие 25:20 шутпа выляса илчĕç, анчах 2-мĕшĕнче 21:25 шутпа çухату тÿсрĕç. 3-мĕшĕнче те хăйсене алла илеймерĕç, 10 очко таран юлса пычĕç. Подачăсем нумай пĕтерчĕç. Вĕçĕнче вăйлă хăваларĕç пулин те, 22:25 шутпа выляса ячĕç. “Дорстрой” 4-мĕш партире те çĕнтерчĕ, (28:26). Çапла вара “Дорстрой” кăçалхипе 3-мĕш хут Васильев кубокне тивĕçрĕ. Финалти вăйă çав тери çивĕч иртнине тĕл пулусен шучĕсем те çирĕплетеççĕ. Турнир çĕршер куракана киленĕç кÿчĕ. Болельщиксем тĕрлĕ ялсенчен пухăннăччĕ. Çулленхи пекех Тăрмăшпа Тушкилтен чылайăн килнĕ, тăвайсем пирки калама та кирлĕ мар.
–Чăн-чăн уяв пулса тăчĕç Вячеслав Васильева асăнса ирттерекен ăмăртусем. Кама кăна курмастăн унта пырсан; Пĕрин те пĕр тăшман çук, пурте туссем, анчах кашни харпăр хăй командине хавхалантарать, – терĕ Вячеслав Георгиевичпа вăрах вăхăт футболла пĕрле вылянă Вячеслав Гаврилович Сидоров (Тăрмăшран), кунта килнисен шухăшне пĕтĕмлетсе. Республикăри чи интереслĕ турнирсенчен пĕри чăннипех туслăх турнирĕ пулса тăчĕ, вăл ăнăçлă çеç мар, çÿллĕ шайра иртрĕ. В. Александровпа В.Захаров судьясем хăйсен ĕçне тĕрĕслĕхе, принциплăха тĕпе хурса пурнăçласа пыма тăрăшрĕç. Г.Масленниковпа В.Чайкин микрофонпа шута пĕлтерсе пычĕç.
Ăмăртусем вĕçленнĕ хыççăн спортсменсене, куракансене район пуçлăхĕн çумĕ Г.Гаврилов тав турĕ, мала тухнисене дипломсемпе парнесем, “Дорстрой” волейболисчĕсене кубок парса чысларĕ. Васильев фондĕнчи пухăннă укçан пĕр пайне Вячеслав Георгиевичăн мăшăрне Софья Николаевнана, çемйине парне те парса чысларĕç. С.Н.Васильева Вячеслав Георгиевичăн сăнарне асра тытнăшăн пурне те тав туса ырлăх-сывлăх сунчĕ.
“Тăвай кооперативĕ” потребобщество спорт уявне хутшăнакансене тин ăшаланă шашлăксемпе, кукăльсемпе, соксемпе, пылак шывсемпе тивĕçтерчĕ. Вăйăсен хушшинчи тăхтавсенче музыка янăрарĕ.
Уйрăлма та шел пулчĕ çивĕч вăйăсенчен. Нумайăшĕ ăна тем таранччен курма хатĕрччĕ.
И.СОЛОВЬЕВ.
Источник: "Ял ĕçченĕ"