10 февраля 2009 г.
Турнир–марафон вĕçленчĕ (Спорт)
Район центрĕнче 2 уйăха яхăн тăсăлнă волейбол турнирĕ вĕçленчĕ. 7 команда хушшинчи икĕ çаврăмлă турнирта “Дорстрой” команди çĕнтерчĕ. Вăл 1-мĕш çаврăмра шалти ĕçсен пайĕнчен çухату тÿсрĕ пулсан, 2-мĕш çаврăмра пур тĕл пулусене те шанчăклăн выляса илчĕ. Команда чысне Тăвай çамрăкĕсем В.Гаврилов, С.Степанов, Л.Леонтьев, Г.Алексеев, Э.Буинцев, В.Сельмин тата хула командисенче вылякан волейболистсем хÿтĕлерĕç. 2-мĕш çаврăмра вĕрентÿ пайĕн командине выляса янă милиционерсем турнирта 2-мĕш вырăн йышăнчĕç. 3-мĕш вырăнта район администрацийĕн волейболисчĕсем.
ДЮСШ çамрăкĕсен те ăсталăх ÿссе пырать. Акă Тушкилпе Йăнтăрчă шкулĕсен вĕренекенĕсенчен тăракан команда, В.Захаров тренерпа тĕреклетнĕскер, 2-мĕш çаврăмра шалти ĕçсен пайĕнчен чутах выляса илмерĕ. 1:1 пулнă хыççăн 3-мĕш партире 13:11 шутпа вĕренекенсем малта пыратчĕç, вĕсене çĕнтерÿ тума 2 очко кăна кирлĕччĕ, анчах опыт çитейменнипе, хăйсене алла илейменнипе 13:15 шутпа выляса ячĕç. Тăрмăшпа Нăрваш шкулĕсен çамрăкĕсем те хăйсене япăх мар енчен кăтартрĕç.
Малти вырăнсем йышăннă командăсене тата чи ăста волейболистсене тĕрлĕ номинацире дипломсемпе парнесем парса хавхалантарнă. Волейболистсене чыслама район пуçлăхĕ Н.Иванов хутшăнчĕ, çивĕч те интереслĕ вăйăсемшĕн тав турĕ, спортра ăнăçусем сунчĕ.
И.ИВАНОВ.
Источник: "Ял ĕçченĕ"