10 февраля 2009 г.
Хĕрарăмсем футболла выляса çĕнтернĕ (Спорт)
Футбол – анлă сарăлнă вăйăсенчен пĕри. Ытларах ăна арçынсем килĕштереççĕ. Иртекен турнирсем те арçынсем хушшинче пулаççĕ. Республикăра хĕрсемпе хĕрарăмсем футболла вылясси те вăй илсе пырать.
Чăваш Республикинчи муниципалитетсен Совечĕ тата Йĕпреç район администрацийĕ пуçарнипе Йĕпреç поселокĕнчи сывлăха çирĕплетмелли “Патвар” комплексра вырăнти хăй тытăмлăх органĕсенче ĕçлекен хĕрсемпе хĕрарăмсем хушшинче мини-футбол турнирĕ иртрĕ. Тăвай районĕ те ăмăртăва хутшăнчĕ. Тăхăр команда хушшинче вăл 1-мĕш вырăн çĕнсе илме пултарчĕ. Турнирта пирĕн хĕрсем пĕр вăйă та выляса яман. Çĕрпÿ тата Йĕпреç районĕсен командисемпе вылянă чухне кăна вăйăсем никам та çĕнтерейменнипе вĕçленнĕ (1:1, 0:0). Çурма финалта çĕмĕрлесене 3:1 шутпа парăнтарнă. Финалта вара тепĕр хут Çĕрпÿ районĕн командипе тĕл пулнă. Вăйă хĕрÿ те çивĕч иртнĕ, 1:1 шутпа вĕçленнĕ. Пенальти тапнă чухне пирĕн хĕрсем ăстарах пулнине тепĕр хут кăтартрĕç, мечĕке темиçе хутчен хапхана кĕртрĕç. Хĕрсен команди турнирта 1-мĕш вырăн йышăнса, ДФСО “Урожай” кубокне çĕнсе илчĕ. Çавăн пекех пирĕн вратарь И.Александрова “Чи лайăх вратарь” ята тивĕçрĕ, ятарлă парне (мечĕк) илчĕ.
Район чысне Йăнтăрчă ял тăрăхĕн пуçлăхĕ И.Хайдукова, çак тăрăхра ĕçлекен Е.Шалыгина, Тушкил ял тăрăхĕнчи И.Филипповапа О.Максимова, Н.Александрова, Тăвай ял тăрăхĕнче ĕçлекен Т.Иванова, ЗАГС уйрăмĕн тĕп специалисчĕ В.Новикова, вĕрентÿ тата çамрăксен политикин пайĕн тĕп специалисчĕ Т.Шашкова, çул çитмен çамрăксен тата вĕсен прависене хÿтĕлекен комиссин секретарĕ И.Александрова хÿтĕлерĕç. Командăна турнира хатĕрленме социаллă аталану, культурăпа спорт пайĕн тĕп специалисчĕ О.Ломоносов пулăшрĕ.
В.КУЗНЕЦОВ.
Источник: "Ял ĕçченĕ"