03 февраля 2009 г.
Профсоюз ĕçĕн активисчĕсене хавхалантарнă (Общество)
Патшалăх учрежденийĕсенче тата социаллă тивĕçтерÿ учрежденийĕсенче ĕçлекенсен профсоюзĕ йĕркеленнĕренпе 90 çул çитрĕ. Çавна май района иртнĕ эрнере асăннă учрежденисенче ĕçлекенсен профсоюзĕн республикăри организацийĕн председателĕ И.Анисимов килсе кайрĕ. Вăл патшалăх учрежденийĕсенче ĕçлекенсен профсоюзĕн ĕçне хастар хутшăнакансене савăнăçлă лару-тăрура юбилей медалĕсемпе наградăларĕ, тав çырăвĕсем пачĕ. Асăннă медале 13 çын тивĕçнĕ. Вĕсен хушшинче район пуçлăхĕ Н.Иванов, ЗАГС пайĕн пуçлăхĕ З.Гаврилова, пушар чаçĕн инструкторĕ З.Степанова, социаллă тивĕçтерÿ центрĕн ĕçченĕсем Е.Ивановапа Т.Алексеева (Тушкил) тата ыттисем.
Иван Анисимович республикăри власть органĕсемпе профсоюз тата ĕç паракансем хушшинче усăллă çыхăнусем йĕркеленнине, анчах экономикăри кризисла пулăмсен вăхăтĕнче профсоюзăн пĕлтерĕшĕ актуаллăрах пулма пултарасса палăртрĕ.
Л.ПАВЛОВА.
Источник: "Ял ĕçченĕ"