27 января 2009 г.
Фермерсем – пулас тухăçшăн (Сельское хозяйство)
Пучах хĕлле тулать, тесе ахальтен каламаççĕ. Акă Сăхăтпуç ялĕнчи хресчен-фермер хуçалăхĕсем пикенсех çитес çуракине хатĕрленеççĕ. Андреев хресчен фермер хуçалăхĕ, сăмахран, кăçал 60 гектар çĕрулми лартса тăвасшăн. Тухăçлă çимĕç çитĕнтерес тесен, паллах, лайăх вăрлăхсăр пуçне удобренисем те тивĕçлисем кирлĕ. Çавăнпа Андреев хресчен фермер хуçалăхĕ 33 тонна кăткăс удобрени туянса хунă. Çакна та асăнмалла, Андреевсем çĕрулмине пĕрремĕш çул кăна çитĕнтермеççĕ, ăна туса илмелли технологие лайăхлатсах пыма тăрăшаççĕ.
Осипов хресчен фермер хуçалăхĕ те 80 тонна удобрени туяннă. Унăн аммиак селитри те, кăткăс удобрени те пур. Осипов 50 гектар çĕр улми, 10 гектар пахча-çимĕç лартса тума тата 310 гектар тĕш тырă культурисем акма пăлăртать.
Акимова хресчен-фермер хуçалăхĕ 11 тонна кăткăс удобрени туяннă çĕрулми туса илме. Унăн та “иккĕмĕш çăкăр” вуншар гектар çинче пулĕ.
Çĕнçырмари Николаев, Çĕнĕ Ишпуçĕнчи Хумышев фермерсем те хăйсем мĕнле культурăсем акса-лартса тăвассине палăртса хунă, халĕ вĕсене никĕслессипе ĕçлеççĕ.
Ку вăхăтра кĕске сроклăх кредитсем йĕркелессипе те тимлеççĕ. Çакнашкал кредит топливо, удобренисем, запас пайсем, вăрлăхсем тата ытти туянма шăпах меллĕ пулмалла. Вăрлăхсем тенĕрен, вĕсен малашлăхлă, тухăçлă сорчĕсене туянас текенсем те пур. Тĕслĕхрен, “Чутеевский” ЯХПК хальхи вăхăтра тухăçлă та шанчăклă шутланакан “Эстер” çурхи тулă тата урпа та чылай туянасшăн кăçалхи çуракинче акса хăварма. “Акконд-агро фирма” обществăпа ытти хăш-пĕр ялта тавар туса илекенсем те вăрлăхлăх ĕрчетме çурхи туллăн асăннă сортне кÿрсе килесшĕн.
Çакăнпа пĕрле, паллах, вырăнта хывса хăварнă вăрлăх хуçалăхĕпе те пикенсе ĕçлемелле, вăрлăхсене сортласа хатĕрлемелле, ака кондицине лартмалла, кивĕ вăрлăхсене май килнĕ таран улăштарса çĕнетессипе те тимлемелле.
Н.КРАСНОВ.
Источник: "Ял ĕçченĕ"